უმცირესობის დეპუტატმა ახალციხის ყოფილ მერს სააპელაციო სასამართლოშიც მოუგო

სააპელაციო სასამართლოში პროცესი 21 მარტს გაიმართა. მოსამართლე ლევან გვარამიამ საქმე ზეპირი მოსმენით განიხილა და ახალციხის რაიონული სასამართლოს გადაწყვეტილება ძალაში დატოვა.

შეგახსენებთ, რომ პარლამენტის წევრს გიორგი კოპაძესა და ქალაქ ახალციხის საკრებულოს დეპუტატს ჯიმშერ გოგოლაურს შორის დაპირისპირება 2015 წლის 10 დეკემბერს „მე–9 არხის “ გადაცემა „დიალოგის“ პირდაპირ ეთერში, ახალციხის 2016 წლის ბიუჯეტის პროექტის განხილვის დროს დაიწყო. გოგოლაურის თქმით, კოპაძემ გადაცემაში მას ბრალი დასდო და განაცხადა, რომ„მაშინ როცა იგი პოლიციის თანამშრომელი იყო, პატიმრებს ბოთლებზე სვამდა და პატიმრები ამის გამო ფანჯრებიდან ხტებოდნენ“.

სწორედ ამის გამო ჯიმშერ გოგოლაურმა პროკურატურას მიმართა. პროკურატურამ საქმეზე გამოკითხვები დაიწყო, თუმცა, საქმის წარმოება არ გააგრძელა იმ მოტივით, რომ ეს სამოქალაქო დავა იყო. მოგვიანებით, 2016 წლის 1 თებერვალს, გოგოლაურმა სამოქალაქო სარჩელი სასამართლოში შეიტანა. გოგოლაური ახალციხის მერისგან საჯაროდ ბოდიშის მოხდასა და სახელმწიფო ბაჟის სახით გადახდილი 100 ლარის ანაზღაურებას ითხოვდა.

ახალციხის რაიონული სასამართლოს მოსამართლემ გია ბერაიამ ჯიმშერ გოგოლაურის სარჩელი ნაწილობივ დააკმაყოფილა. სწორედ ეს გადაწყვეტილება გაასაჩივრა გიორგი კოპაძის ადვოკატმა სააპელაციო სასამართლოში.

[თინათინ ზაზაძე, ახალციხე]