დეპუტატი გიორგი კოპაძე ჯიმშერ გოგოლაურის მიმართ ცილისწამებას უარყოფს

უზენაესი სასამართლოს გადაწყვეტილებით გიორგი კოპაძემ ჯიმშერ გოგოლაურის მიმართ ადგილობრივი ტელევიზიის „მეცხრე არხის“ ეთერში გაკეთებული განცხადება, ამავე ტელევიზიის ეთერით უნდა უარყოს. თუმცა, იმის გამო, რომ კოპაძე სასამართლოს გადაწყვეტილებას არ ასრულებდა, ჯიმშერ გოგოლაურმა აღსრულების ეროვნულ ბიუროს მიმართა. ახლა უკვე, კოპაძის ადვოკატი დავით მუმლაძე ამბობს, რომ „დეპუტატი გოგოლაურის მიმართ იმ განცხადებას უარყოფს, რაც მან მეცხრე არხის ეთერში გააკეთა. თარიღი უნდა გვაცნობოს ტელევიზიამ თუ როდის დაუთმობენ დროს და ჩვენ ამისთვის მზად ვართ“.

იმის გასაკრვევად, თუ როდის დაეთმობა „მეცხრე არხის“ ეთერი პარლამენტის წევრს, აღსრულების ეროვნულმა ბიურომ „მეცხრე არხს“ წერილობით უკვე მიმართა. ტელევიზიაში ამბობენ, რომ თარიღს დააზუსტებენ და უწყებას წერილობითვე აცნობებენ.

„ეტყობა ადვოკატებმა აუხსნეს, რომ თუ ბოდიშს არ მომიხდის სისხლის სამართლებრივი დევნა დაიწყება და იმ სტატუსაც დაკარგავს, რაც დღეს აქვს, ამიტომ ურჩევნია ისვე „მეცხრე არხის“ საშუალებით უარყოს თავისი ნათქვამები“, – ამბობს ახალციხის საკრებულოს ყოფილი დეპუტატი ჯიმშერ გოგოლაური.

შეგახსენებთ, რომ აღსრულების ეროვნულ ბიუროში სააღსრულებო ფურცელი ჯიმშერ გოგოლაურმა 12 ივნისს შეიტანა.

პარლამენტის წევრს გიორგი კოპაძესა და ქალაქ ახალციხის საკრებულოს ყოფილ დეპუტატს ჯიმშერ გოგოლაურს შორის დაპირისპირება 2015 წლის 10 დეკემბერს დაიწყო. ახალციხის ტელეკომპანია „მე–9 არხის“ გადაცემა „დიალოგში“, პირდაპირ ეთერში, ახალციხის 2016 წლის ბიუჯეტის პროექტის განხილვის დროს, გიორგი კოპაძემ გოგოლაურს ბრალი დასდო, რომ პოლიციაში მუშაობის დროს პატიმრების უფლებებს არღვევდა. ცილისწამებისთვის გოგოლაურმა კოპაძეს უჩივლა და მას სამივე ინსტანცია მოუგო.

ჯიმშერ გოგოლაურს მაშინ სასარჩელო მოთხოვნაში, გიორგი კოპაძის მხრიდან ბოდიშის მოხდის მოთხოვნა, „მეცხრე არხთან“ ერთად „სამხრეთის კარიბჭეს“ ეთერიდანაც ჰქონდა, თუმცა სასამართლომ ეს ნაწილი არ დაუკმაყოფილა და მხოლოდ ის მედიასაშუალება დატოვა, სადაც კოპაძემ, გოგოლაურის მიმართ ცილისმწამებლური განცხადება გააკეთა.

[ლუბა გიორგაძე, ახალციხე]