საარჩევნო მასალებისა და შეხვედრებისთვის გამოყოფილი ადგილები ადიგენში

ადიგენის მუნიციპალიტეტის გამგეობამ მუნიციპალიტეტის მასშტაბით წინასაარჩევნოდ შეხვედრების გამართვისთვის კულტურის სახლები გამოყო.

საარჩევნო სუბიექტები შეხვედრებს დაბა ადიგენში, აბასთუმანში, უდეში, არალში, ვარხანში, ბოლაჯურში, ფხეროში, დიდი სმადასა და ჭელაში მდებარე კულტურის სახლებში გამართავენ.

რაც შეეხება ადგილებს, სადაც საარჩევნო ბანერის გაკვრა იკრძალება, ეს ადიგენის მუნიციპალიტეტის საკრებულოს N25 დადგენილებითაა განსაზღვრული.

ადიგენის მუნიციპალიტეტში საარჩევნო – სააგიტაციო მასალის გაკვრა იკრძალება ნებისმიერი კონფესიის საკულტო ნაგებობაზე, სახელმწიფო ორგანოების, სასამართლოს, პროკურატურის, სამხედრო შენაერთებისა და პოლიციის შენობებზე, ასევე საგზაო ნიშნებზე.

იგივე დადგენილებითაა განსაზღვრული ადგილები, სადაც საარჩევნო მასალის გაკვრა შეიძლება. ეს არის სახელმწიფო და ადგილობრივი მნიშვნელობის საავტომობილო გზების გასწვრივ მდებარე ღამის განათების ბოძები.

დასაშვებია საარჩევნო მასალის გაკვრა იმ შენობების შემომსაზღვრელ ღობეებზე, რომლებშიც განთავსებულია ადგილობრივი თვითმმართველობის მმართველობაში არსებული კერძო სამართლის იურიდიული პირები.

ასევე, შეიძლება საარჩევნო მასალის კერძო შენობა-ნაგებობებსა და ღობეებზე გაკვრა, თუ ეს მათ მესაკუთრეებთან და მფლობელებთან იქნება შეთანხმებული.

საარჩევნო სუბიექტები ვალდებულები არიან არჩევნების საბოლოო შედეგების ოფიციალურად გამოქვეყნებიდან 5 დღის ვადაში უზრუნველყონ სააგიტაციო ბეჭდვითი მასალის ჩამოხსნა.

[თამუნა უჩიძე, ახალციხე]