ახალციხეში ავარიის შედეგად სამი მანქანა დაიმტვრა [ფოტო]

შემთხვევა დღეს, 13 ივლისს, ახალციხეში მოხდა. „ტოიოტას“ მძღოლმა საჭე ვერ დაიმორჩილა და ორ მანქანას დაეჯახა.

„ძლიერი ხმაური იყო და გარეთ გამოვედი. როგორ მოხდა არ ვიცი, მანქანები აღარ გამოდგება. ერთ მანქანას ქართული ნომრებიც არ აქვს, მგონი დასასვენებლად იყვნენ ჩამოსულები“, - ამბობს ერთ-ერთი თვითმხილველი.

შემთხვევის შედეგად, მსუბუქი დაზიანებები მიიღო ორმა ქალმა. ისინი სასწრაფო დახმარების ჯგუფმა ახალციხის კლინიკა „იმედში“ გადაიყვანეს.

„მდგომარეობა მძიმე არ არის. ერთს მსუბუქი ტრამვა აქვს, მარჯვენა ხელზე ბზარი და თავზე აქვს პატარა ჭრილობა. მეორეს მენჯ-ბარძაყის სახსარზე აქვს პრობლემა. სერიოზული არაფერია“, - ამბობენ კლინიკა „იმედში“.

ადგილზე მუშაობდნენ საპატრულო პოლიციისა და სამაშველო სამსახურის ჯგუფები.

შსს-ს ინფორმაციით, საქმეზე ძიება 276 მუხლის მეორე ნაწილით მიმდინარეობს. რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე ან მძიმე დაზიანება გამოიწვია.









[თაკო ფეიქრიშვილი, ახალციხე]