სასწრაფოს მანქანაზე შეჯახების გამო მსუბუქი ავტომობილის მძღოლს დააჯარიმებენ

„ტოიოტას“ მარკის მანქანის მძღოლის ადვოკატი, მარტიროს ოგანესიანის თქმით, მისი დაცვის ქვეშ მყოფს 250 ლარიანი ჯარიმის გადახდა მოუწევს, გაასაჩივრებენ თუ არა ამ გადაწყვეტილებას, ჯერ არ იციან.

მსუბუქი მანქანის მძღოლი მიიჩნევს, რომ მის ნაცვლად სასწრაფოს მანქანის მძღოლი უნდა დაეჯარიმებინათ.

„უსამართლო გადაწყვეტილებაა, ამბობენ სასწრაფო 60 კმ/სთ–ით მოძრაობდაო, მუხრუჭის გამოყენების შემდეგ 30 მეტრი იხოხა და მერე შემეჯახა, მე რომ მართლა მის გზაზე ვყოფილიყავი ბოლომდე გასული არამგონია გადავრჩენილიყავი ისეთი სიჩქარით დამეჯახებოდა. მე რომ რამე მომსვლოდა ვის დაბრალდებოდა ეს ყველაფერი?! ვთვლი რომ მისი ბრალი იყო, ასე სწრაფად რომ არ ემოძრავა არაფერი მოხდებოდა“, - ამბობს მსუბუქი მანქანის მძღოლი.

შსს-ში დაგვიდასტურეს რომ საქმეზე სისხლის სამართლის ძიება შეწყდა.

ავტოსაგზაო შემთხვევა 14 ივნისს 15:00 საათზე, კოსტავას ქუჩაზე მოხდა. სასწრაფო სამედიცინო დახმარების მანქანა, რომელსაც მძიმე ავადმყოფი სოფელ საძელიდან კლინიკაში გადაჰყავდა, ჯერ მსუბუქ მანქანას შემდეგ კი ხეს შეეჯახა.

[მარიამ ბარძიმაძე]