ხალიჩების ფესტივალი დღეს ოფიციალურად გაიხსნება

ღონისძიებას საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი, ქალაქ ახალციხის მუნიციპალიტეტის მერი გიორგი კოპაძე, ხალიჩების საერთაშორისო ფესტივალისა და კავკაზ ჯაზ-ფესტივალის ორგანიზატორები და მოწვეული სტუმრები დაესწრებიან. ფესტივალის ოფიციალური გახსნის შემდეგ სტუმრები ხალიჩების საერთაშორისო ფესტივალის პავილიონებს დათვალიერებენ.

ხალიჩების საერთაშორისო ფესტივალი "რაბათი" საქართველოს კულტურისა და ძეგლთა დაცვის სამინისტროს მხარდაჭერით, პროექტის „Check In Georgia -ს ფარგლებში ტარდება.

ფესტივალის ორგანიზატორია საქართველოს ხალხური და გამოყენებითი ხელოვნების მუზეუმი, თანამონაწილეები: აბრეშუმის სახელმწიფო მუზეუმი, მირზა ფათალი ახუნდოვის სახელობის აზერბაიჯანული კულტურის მუზეუმი, ა.ა.ი.პ. “ახალციხის ციხე,” საქართველოს ეროვნული მუზეუმის სამცხე-ჯავახეთის მუზეუმი; ქალაქ ახალციხის მუნიციპალიტეტი.

ხალიჩების საერთაშორისო ფესტივალის გახსნის პარალელურად, დღესვე, 17:00 საათზე, რაბათში, საქართველოს კულტურისა და ძეგლთა დაცვის სამინისტროსა და არასამთავრობო ორგანიზაციის „Art Bridge” ორგანიზებით, Kavkaz Jazz Festival 2016 -ის დასკვნითი გალა კონცერტი გაიმართება, რომელშიც მონაწილეობას მიიღებენ: ARTE Band (ირანი) და Miqayel Voskanyan & Friends (სომხეთი). ამავე კონცერტზე დაუკრავს ჯგუფი „სტუმრები“ (საქართველო). დასწრება უფასოა.

[ვარლამ წიკლაური, ახალციხე]