ახალციხეში ხალიჩების საერთაშორისო ფესტივალი გაიმართება

ხალიჩების მეორე საერთაშორისო ფესტივალი, საქართველოს კულტურისა და ძეგლთა დაცვის სამინისტროს მხარდაჭერით, პროექტ Check In Georgia - ს ფარგლებში იმართება. ფესტივალის მიზანია ტრადიციული ხალიჩური ნაწარმის რეწვის, როგორც ქართული კულტურული მემკვიდრეობის მნიშვნელოვანი ნაწილის, პოპულარიზაცია და ხალხური რეწვის ოსტატების მხარდაჭერა.

ფესტივალზე რვა ქვეყანა მიიღებს მონაწილეობას: ირანი, თურქმენეთი, ყირგიზეთი, ინდოეთი, აზერბაიჯანი, სომხეთი, თურქეთი და საქართველო. წარმოდგენილი იქნება თანამედროვე ხალიჩური ნაწარმი. ადგილობრივი და მოწვეული ხალხური ოსტატები ჩაატარებენ ხალიჩის და ფარდაგის წარმოების პროცესის სხვადასხვა ეტაპის და ტექნიკის ჩვენებებს;

ფესტივალის მსვლელობისას ჩატარდება მრავალფეროვანი საგანმანათლებლო პროგრამები ხალიჩების, ფარდაგების ორნამენტის, ფერის, დიზაინის, ქსოვის ტექნიკის შესახებ.

საგანმანათლებლო პროგრამებს მოამზადებს: საქართველოს ხალხური და გამოყენებითი ხელოვნების მუზეუმი, აბრეშუმის სახელმწიფო მუზეუმი, ვიზუალური ხელოვნების და დიზანის სკოლა; მირზა ფათალი ახუნდოვის სახელობის აზერბაიჯანული კულტურის მუზეუმი.

ფესტივალზე გამოფენილი იქნება საქართველოში არსებული სხვადასხვა სასწავლებლების სახელოსნოების სტუდენტების ნამუშევრები; ტანსაცმლის დიზაინის კოლექციები ყირგიზეთიდან და თურქმენეთიდან, სადაც ხალიჩების ორნამენტებია გამოყენებული.

თბილისის ხალიჩების გალერეები წარმოადგენენ ნიმუშებს თავიანთი კოლექციებიდან. შესაძლებელი იქნება სხვადასხვა ნიმუშების შეძენა.

ორგანიზატორების განცხადებით, ფესტივალი 28 ივნისს თბილისში, ეროვნულ მუზეუმში აზერბაიჯანის ხალიჩების მუზეუმის კოლექციის გამოფენით გაიხსნება, ხოლო ახალციხეში საზეიმო გახსნა 30 ივნისს, 13:00 საათზე გაიმართება.

რაბათში ხალიჩების საერთაშორისო ფესტივალი დამთვალიერებლებისთვის 1-ელ და 2 ივლისს, 10:00 საათზე გაიხსნება და 18:00 საათამდე იქნება ღია.

ხალიჩების საერთაშორისო ფესტივალზე დასწრების მსურველთათვის, 1-ელ და 2 ივლისს, თბილისიდან ახალციხის მიმართულებით უფასო ავტობუსი იმოძრავებს. ავტობუსი ვარდების რევოლუციის მოედნიდან 08:00 საათზე გავა, უკან კი 23:00 საათზე დაბრუნდება.

[sknews.ge]