ახალციხეში ხალიჩების ფესტივალი გაიმართება

ფესტივალი საქართველოს კულტურისა და ძეგლთა დაცვის სამინისტროს მხარდაჭერით ტარდდება. ფესტივალის ორგანიზატორია საქართველოს ხალხური და გამოყენებითი ხელოვნების მუზეუმი, თანამონაწილეები: აბრეშუმის სახელმწიფო მუზეუმი, მირზა ფათალი ახუნდოვის სახელობის აზერბაიჯანული კულტურის მუზეუმი, ააიპ “ახალციხის ციხე,” საქართველოს ეროვნული მუზეუმის სამცხე-ჯავახეთის მუზეუმი; ქალაქ ახალციხის მუნიციპალიტეტი.

ფესტივალი საზეიმოდ გაიხსნება 2016 წლის, 11 ივნისს, 15.00 საათზე. გახსნის ცერემონიის შემდეგ კულტურისა და ძეგლთა დაცვის სამინისტროსა და არასამთავრობო ორგანიზაციის ”Art Bridge” -ის ორგანიზებით, Kavkaz Jazz Festival 2016 -ის დასკვნითი გალა კონცერტი გაიმართება.

ხალიჩების საერთაშორისო ფესტივალი ახალციხის ზედა და ქვედა ციხეების ტერიტორიაზე მოეწყობა. ადგილობრივი და მოწვეული ხალხური ოსტატები, სახელოსნოები ქვედა ციხის ტერიტორიაზე თანამედროვე ხალიჩურ ნაწარმს წარმოადგენენ. ჩატარდება მატყლის დამუშავების, დართვისა და ნართის ღებვის დემონსტრაციები. ხალიჩების გალერეები მოაწყობენ გამოფენა-გაყიდვას. იმუშავებს 20-მდე პავილიონი, სადაც დამთვალიერებლებს შესაძლებლობა ექნებათ გაეცნონ მრავალფეროვან ხალიჩურ ნაწარმს, შეხვდნენ ხალხურ ოსტატებსა და ექსპერტებს სხვადასხვა ქვეყნიდან.

საინფორმაციო პავილიონში დამთვალიერებლებს შესაძლებლობა ექნებათ მიიღონ ამომწურავი ინფორმაცი ახალიჩურ ნაწარმზე, გაესაუბრონ ექსპერტებს, ნახონ დოკუმენტური ფილმები და დაათვალიერონ ლიტერატურა სხვადასხვა ხალიჩურ ნაწარმზე; გადაიღონ ჯგუფური პორტრეტები ხალიჩის ფონზე.

ფესტივალის მონაწილე მუზეუმები, ყოველ დღე ჩაატარებენ საგანმანათლებლო - შემეცნებით პროგრამებს სხვადასხვა ასაკის ვიზიტორებისათვის.

ფესტივალის ფარგლებში აბრეშუმის სახელმწიფო მუზეუმი კულტურის სამინისტროს მხარდაჭერით გამართავს საერთაშორისო კონფერენციას „ხალიჩა, როგორც კულტურული მემკვიდრეობა და მეხსიერება”. კონფერენცია მოიცავს ახალ სამეცნიერო კვლევებს; ხალიჩების და ფარდაგების მწარმოებელი გაერთიანებების პრეზენტაციებს; ბუნებრივი საღებავებით ღებვის ლექცია-დემონსტრაციებს და დისკუსიებს ხალიჩების რეწვის დღევანდელი გამოწვევების შესახებ. მოეწყობა გამოფენები სხვადასხვა მუზეუმების კოლექციებიდან.

[sknews.ge]