მის და მისტერ ახალციხე 2016 – კონკურსი მოზარდებისთვის

ახალციხეში "მის და მისტერ ახალციხე 2016“–ს აირჩევენ. კონკურსში მონაწილეობის მსურველთა რეგისტრაცია უკვე დაწყებულია.
კონკურსი გოგონებისა და ვაჟებისათვის სამ ასაკობრივ კატეგორიაში გაიმართება: 4 – დან 10 წლამდე, 10 – დან 14 წლამდე და 14 – დან 18 წლამდე.

პირველი ტური 17 ივნისს, 14:00 საათზე მე–6 საჯარო სკოლის დარბაზში გაიმართება.

კონკურსი ინიციატორები ორგანიზაცია „ქართული გვარები“ და სამოდელო სააგენტო "best models"-ი არიან.

,,ეს არის სილამაზის კონკურსი და სილამაზე ყველას თავისებური აქვს. ჩვენ ვეძებთ სახეს, რომ გამოგვადგეს, როგორც პოდიუმზე, ასევე რეკლამისთვის. პირველი ტურის საფასური 20 ლარია, ფინალში გადასვლის შემთხვევაში კი კონკურსანტი 50 ლარს ამატებს“, – განმარტავს კონკურსის ერთ–ერთი ორგანიზატორი, ფოტოგრაფი ნანჩიკო მაისურაძე.

მისივე თქმით, პირველ ტურში მონაწილემ ყოველდღიური ტანისამოსი, ჩაცმის თავისუფალი სტილი უნდა წარმოადგინოს. ფინალურ ტურში კი მას ყოველდღიური, კლასიკური და ეროვნული სამოსის ჩაცმა მოუწევს.

ფინალში გამსვლელებს სამოდელო სააგენტო პირველ ტურზე გამოავლენს.

დასკვნითი ღონისძიება 21 ივნისს გაიმართება, სადაც გამარჯვებულები ექვს მთავარ ნომინაციაში გამოვლინდებიან:
14–18 წელი – მის და მისტერ ახალციხე;
10–14 წელი – პატარა მის და პატარა მისტერ ახალციხე;
4–10 – პრინცესა და პრინცი.

გარდა ამისა, გამარჯვებულები გამოვლინდებიან სხვა დამატებით ნომინაციებშიც. ყველა მათგანს ფასიანი საჩუქრები გადაეცემა.
კონკურსის მთავარი ჟიურის შემადგენლობაში არიან: მის თბილისი –ანი გაბლაია, "best models"-ის დირექტორი კახი ხაბეიშვილი, მისტერ ვალენტინი – ჯაბა ჯანაძე, ფოტოგრაფი ნანჩიკო მაისურაძე და ორგანიზაცია "ქართული გვარების" პრეზიდენტი ინგა სიორიძე.
ორგანიზატორების თქმით, ამ დროისათვის, ახალციხეში უკვე რეგისტრირებულია 16 მოზარდი.

მსურველებს დარეგისტრირება სატელეფონო ზარის საშუალებით შეუძლიათ, ნომრებზე : 593 48 48 31, 579 12 60 72.

[თაკო ფეიქრიშვილი, ახალციხე]