პრემიერი სამცხე–ჯავახეთში აგროტურიზმის განვითარებაზე

პრემიერის თქმით, მესხური ტერასების აღდგენის პროცესი საჯარო და კერძო სექტორის ურთიერთთანამშრომლობის კარგი მაგალითია.

"რა თქმა უნდა, ამას წინ უძღოდა იქ მოსახლე არაერთი ადამიანის თავდადებული პატრიოტიზმი, რომლებიც წლების განმავლობაში ინახავდნენ ამ ჯიშებს. ეს იყო, თუ არ ვცდები, ბატონი ალექსანდრე დევნოსაძე და კიდევ რამდენიმე ასეთი ადამიანი. რა თქმა უნდა, ასევე, აღსანიშნავია ჯიღაურას მეურნეობა, რომელმაც უდიდესი სამუშაო გაწია. 20 მილიონ ლარზე მეტი ინვესტიცია იქნა დახარჯული ფონდი „ქართუს“ მიერ და ეს მეურნეობა მთლიანად უსასყიდლოდ გადმოეცა სახელმწიფოს. აქ 460-ზე მეტი ქართული ჯიში არის შენახული და ეს ჯიშები უკვე მომავალში იქნება ხელმისაწვდომი ყველა მეურნისთვის, რომელიც მოისურვებს ტრადიციული ავთენტური ქართული ჯიშების განვითარებას”, – განაცხადა გირგი კვირიკაშვილმა.

პრემიერ–მინისტრმა ყურადღება გაამახვილა რეგიონში აგროტურიზმის განვითარების გზებზეც. მისი თქმით, აღდგება სოფელი ჭაჭკარი, რომელსაც კულტურული მემკვიდრეობის ძეგლის სტატუსი აქვს მინიჭებული: "მოგეხსენებათ, ეკონომიკის სამინისტროში გავაკეთეთ ვარძია-ხერთვისის მთლიანი, გენერალური დაგეგმარება იმისათვის, რომ კულტურული მემკვიდრეობა იყოს დაცული ამ ტერიტორიაზე და მომავალი განვითარება მოხდეს კანონზომიერად, რათა არ დაირღვეს კულტურული ლანდშაფტი და შემოინახოს პირვანდელი სახით“.

მისივე განცხადებით, ასევე, ძალიან მნიშვნელოვანია ვარძიის კომპლექსის 4-წლიანი შენახვა-განვითარების გეგმა, რომელსაც კულტურის სამინისტრო ახორციელებს, ასევე, ფონდ „ქართუსთან“ ერთად.

„ვარძიის კომპლექსის მთლიანად, სამეცნიერო დონეზე, საერთაშორისო ექსპერტების ჩართვით შენახვა-განვითარების გეგმის შემუშავება ხდება და ამ გეგმის მიხედვით, ნაბიჯ-ნაბიჯ მოხდება იმ აუცილებელი ინფრასტრუქტურის განვითარება, რომელიც ვარძიის კომპლექსს დაიცავს როგორც ბუნებრივი კატაკლიზმებისაგან, ასევე მისი განვითარების გეგმაზომიერ, დროში გაწერილ გეგმას შეიმუშავებს“, – განაცხადა გიორგი კვირიკაშვილმა.

[sknews.ge]