ასპინძაში სოფელ ჭაჭკარის რეაბილიტაცია იწყება

დღეს, 4 ივნისს, უძველესი სოფლის, უნიკალური ისტორიული და კულტურული მემკვიდრეობის უძრავი ძეგლის - ჭაჭკარის რეაბილიტაციის პროექტის პრეზენტაცია გაიმართა.

„ჩვენი ვალია, შევინახოთ, მოვუაროთ და მთელს მსოფლიოს გავაგებინოთ ჩვენი უნიკალური კულტურის შესახებ“, – განაცხადა საქართველოს პრემიერ-მინისტრმა გიორგი კვირიკაშვილმა.

მისი თქმით, ჭაჭკართან დაკავშირებთ ხორციელდება გენერალური დაგეგმარება, ეს კი მნიშვნელოვანია იმისთვის, რომ შენარჩუნდეს ტერიტორიის ავთენტურობა და ისტორიული იერსახე: “ეს უნდა შეინახოს მომავალი თაობებისთვის, მსოფლიოსთვის, რომ ქართული ცივილიზაციის განვითარების სხვადასხვა ეტაპის შესახებ, მეტი გახდეს ცნობილი“.

სოფელ ჭაჭკარის რეაბილიზაცია საქართველოს კულტურული მემკვიდრეობის დაცვის ეროვნული სააგენტოს, "თი ბი სი ფონდისა" და კავშირი „ქართული სახლის“ ერთობლივი ინიციატივით ხორციელდება.

"ეს იქნება სახელმწიფოსა და კერძო სექტორს შორის პარტნიორობის კიდევ ერთი, ძალიან მნიშვნელოვანი ისტორიული მაგალითი. ჭაჭკარი იქნება უნიკალური სოფელი, რომელიც აღდგება და მძივივით აიკინძება ვარძიის კომპლექსის გარშემო, როგორც ხიზაბავრას ვენახები, არაერთი ციხესიმაგრე, სარო და ა.შ. თითოეული ეს მძივი იქნება მარგალიტივით ჩვენი კულტურული მემკვიდრეობის იმ ძალიან მდიდარ ჯაჭვში, რომელიც გაგვაჩნია ", - განაცხადა პრემიერ-მინისტრმა.

მთავრობის მეთაურმა განსაკუთრებული მადლობა გადაუხადა ადგილობრივ მოსახლეობას, რომლებიც უნიკალურ კომპლექსს "დაჰკანკალებენ და ინახავენ" და იმედი გამოთქვა, რომ კომპლექსი რეგიონისთვის არაერთი სიხარულის მომტანი იქნება.

საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის ნიკოლოზ ანთიძის თქმით, ამ ეტაპზე პროექტის მხოლოდ კონცეფციაა მომზადებული: „ ამის შემდეგ დავიწყებთ სამუშაო ჯგუფით პროექტის მომზადებას. ასეთი ჯგუფი სხვადასხვა სამინოსტორს წარმომადგენლებისგან უკვე შექმნილი გვაქვს. ანუ ჯერ კიდევ დასაზუსტებელია კონცეფცია თუ რისი გაკეთება გვინდა. პროექტის ვადებსა და ტექნიკურ დეტალებზე ამის შემდეგ ვისაუბრებთ“.

სოფელი ჭაჭკარი მტკვრის ორივე ნაპირზეა გაშენებული და უნიკალური ადგილმდებარეობით, კულტურული მემკვიდრეობის ობიექტების სიმრავლითა და ისტორიული მნიშვნელობით, რეგიონის კულტურული ლანდშაფტის ერთ–ერთ მნიშვნელოვან ცენტრს წარმოადგენს.

გადმოცემის მიხედვით, ჭაჭკარიდან ხდებოდა ვარძიის სამეურნეო მარაგის შევსება - კლდეში ნაკვეთ საწნახელებში დიდი რაოდენობის ღვინო იწურებოდა. სოფელში, გარდა დაზიანებული ტერასებისა და 50–მდე კლდეში ნაკვეთი საწნახელისა, შემორჩენილია ოთხსაუკუნოვანი ვაზიც.

[თამუნა უჩიძე, ასპინძა]