ვარძიის გადარჩენისთვის 4–წლიანი პროექტი დაიწყო

მთავრობის სარეზერვო ფონდიდან ვარძიის კომპლექსისათვის 570.000 ლარის გამოყოფის შესახებ გადაწყვეტილება საქართველოს მთავრობამ 5 სექტემბერს მიიღო.

უნიკალური კლდეში ნაკვეთი კომპლექსის გადარჩენის 4 წლიანი პროექტის პირველ ეტაპზე დაგეგმილია მულტიდისციპლინარული კვლევები და მთელი რიგი სამუშაოები.

პროექტის შედეგად: ვარძიის კომპლექსის კლდის დაზიანებათა და ქვათაცვენის რისკების პირველად რუკებს შეიმუშავებენ; დაგეგმილია საკონსერვაციო საჭიროებების პირველადი შეფასება; კონკრეტული გადარჩენითი ღონისძიებების შედეგად მნიშვნელოვნად შემცირდება წყლის მასების ფერდობზე ჩამოდინება, რაც შეამცირებს ქვათაცვენის რისკებს; კონკრეტული რისკების მოხსნით (კლდის 2 ლოდის გამაგრება) აღმოიფხვრება კომპლექსის ფრაგმენტის განადგურების საშიშროება და უზრუნველყოფილი იქნება ვიზიტორებისა თუ მომსახურე პერსონალის უსაფრთხოება;

ვარძიის კომპლექსის გადარჩენის 4 წლიანი პროექტი ადგილობრივებს კულტურის მინისტრმა მიხეილ გიორგაძემ და კულტურული მემკვიდრეობის დაცვის ეროვნული სააგენტოს ხელმძღვანელმა ნოკოლოზ ანთიძემ, 20 სექტემბერს, ვარძიაში „შოთაობის“ დღესასწაულზე გააცნო.

„დღეს უკვე დავიწყეთ იმ პროექტის განხორციელება, რაც აქამდე დავაანონსეთ. ეს არის ინფრასტრუქტურის მოწყობა რთული ადგილების გამაგრება და განათების მოწყობა“, - განმარტა კულტურული მემკვიდრეობის დაცვის ეროვნული სააგენტოს ხელმძღვანელმა ნოკოლოზ ანთიძემ.

„ყველაფერი უნდა გავაკეთოთ იმისთვის, რომ ეს უნიკალური კულტურული ძეგლი გადავარჩინოთ და მომავალ თაობებს შევუნახოთ“, -განაცხადა კულტურისა და ძეგლთა დაცვის მინისტრმა მიხეილ გიორგაძემ.

[თინათინ ზაზაძე, ასპინძა]