ბორჯომ–ხარაგაულის ეროვნულ პარკში ტყე იწვის

როგორც ადგილობრივები ამბობენ, ტყეში კვამლი დაახლოებით 14:00 საათისთვის შენიშნეს.

„სოფლიდან 16 კილომეტრის მოშორებით, ნაკრძალის ტერიტორიაზე გაჩნდა ცეცხლი, კვამლის სუნი სოფელშიც იგრძნობა“, – ამბობს წინუბანში მცხოვრები თეა ყულიევა.

ახალციხის სახანძრო–სამაშველო სამსახურის უფროსის პაატა კბილაშვილის ინფორმაციით, ხანძრის ჩასაქრობად ადგილზე გაგზავნილია ახალციხის სახანძრო–სამაშველო სამსახურის ბრიგადები.მისივე ინფორმაციით, ადგილზე გასულები არიან ბორჯომ–ხარაგაულის ეროვნული პარკის თანამშრომლებიც.

„ველდებით დეტალებს, მეც მივდივარ, გზაში ვარ“, – განაცხადა პაატა კბილაშვილმა.

მისივე თქმით იქ, სადაც ხანძარი გაჩნდა, მიუვალი ადგილია და სავარაუდოდ სახანძრო მანქანებით მისვლას ვერ შეძლებენ.

ბორჯომ–ხარაგაულის ეროვნული პარკის ადმინისტრაციის უფროსი ლევან თაბუნიძე ჯერჯერობით დეტალებზე ვერ საუბრობს: „კონკრეტულად რა ფართობზეა არ ვიცით, შესაძლებელია ხანძარი არც არის და ცეცხლი უნთია ვინმეს. კვამლი დაფქისირდა და კვამლის შესაბამისად მოხდა რეაგირება. გაგზავნილი გვყავს თანამშრომლები, პირველ ეტაპზე უნდა მოხდეს ადგილის იდენტიფიცირება“.

სოფელ გურკელში ამბობენ, რომ ხანძრის კერები სოფლიდანაც კარგად ჩანს. ადგილობრივების თქმით, ის ტერიტორია, სადაც ახლა ხანძარია, 2004 წელსაც დაიწვა, მაშინ ხანძრის ჩაქრობა ვერტმფრენების საშუალებით შეძლეს.

[თინათინ ზაზაძე, ახალციხე]