World Vision: ახალციხისა და ადიგენის სოფლებში ბავშვთა შრომის მაჩვენებელი მაღალია

"საქართველოში ბავშვების 70%–ზე მეტი ძალადობის მსხვერპლია“, – ეს შედეგი World Vision-საქართველოს კვლევამ აჩვენა. იგი ორგანიზაციამ 2015 წლის ნოემბრის თვეში, ქვეყნის 3 რეგიონში: სამცხე–ჯავახეთში, კახეთსა და იმერეთში ჩაატარა.

სამცხე–ჯავახეთის მასშტაბით, კვლევა ახალციხის 10 სოფელში ჩატარდა: კლდეში, წნისში, აგარაში, მუსხში, ურაველში, ვალეში, სხვილისში, ზემო სხვილისში, წყრუთსა და წირაში. ადიგენის მუნიციპალიტეტში კი 8 სოფელში: დერცელში, მოხეში, ზარზმაში, ზანავში, გომაროში, ბოლაჯურში, უდესა და არალში.

კვლევის ფარგლებში, ინტერვიუები, სამუშაო შეხვედრები და ფოკუს ჯგუფებთან მუშაობა, გოგონებთან და ვაჟებთან ცალ–ცალკე ჩატარდა. კვლევის ასაკობრივი კატეგორიას 12–დან 17 წლის მოზარდები წარმოადგენდნენ.

როგორც World Vision საქართველოს ბავშვთა დაცვის მუშაკი მარიამ ნარიმანაშვილი განმარტავს, კვლევის შედეგებმა აჩვენა, რომ ბავშვებს ბევრი პრობლემა აწუხებთ, რაც მათ ყოველდღიურ ცხოვრებაში ვლინდება.

მისი თქმით, სოფლებში ბავშვთა შრომის მაღალი მაჩვენებელი დაფიქსირდა, რის გამოც, მათ განათლების ხელმისაწვდომობის უფლება შეეზღუდათ.

"ხშირად, მე პირადად მიწევს მუშაობა ისეთი ტიპის შემთხვევებზე, როდესაც ბავშვები სეზონურად დადიან ყანებში სამუშოდ. შესაბამისად, ისინი ვერ ესწრებიან გაკვეთილებს. ამით ფაქტობრივად მათ მომავალს დიდი საფრთხე ექმნება“, – ამბობს მარიამი.

World Vision საქართველოს კვლევაში, ბავშვების გარდა ჩართული იყვნენ მშობლების ორი ჯგუფი, ასევე სხვადასხვა უწყების წარმომადგენლები, რომლებსაც აქტიურად უწევთ ბავშვებთან მუშაობა. კერძოდ: პოლიცია, სოციალური მომსახურების სააგნეტო და ჯანდაცვის წარმომადგენელი.

რელიგიური როლის წარმოჩენისათვის, კვლვისას გაესაუბრნენ სასულიერო პირებს. მათ შორის: მართლმადიდებელ და კათოლიკე მღვდლებს, სომხური სამოციქულო ეკლესიის მოძღვარსა და მუსლიმ სასულიერო პირს.

მარიამ ნარიმანაშვილი ამბობს, რომ კვლევისას ბავშვები და მშობლები აქცენტს სხვადასხვა საკითებზე ამახვილებდნენ.

"როდესაც ბავშვებს ვეკითხებოდით, რა გაწუხებთ და შემდეგ იმავე კითხვას ვუსვამდით მშობლებს, მათ სრულიად სხვადასხვა პასუხები ჰქონდათ. აღმოჩნდა, რომ ბულინგი, რომელიც არის ბავშვთა შორის ჩაგვრა, ბავშვებში ძალიან აქტუალური იყო, თუმცა მშობლები ამას პრობლემად ვერ აღიქვამდნენ“, – იხსენებს ბავშვთა დაცვის მუშაკი.

კიდევ ერთი პრობლემა, რომლის მაჩვენებელიც სამცხე–ჯავახეთში გაცილებით მაღალია, ვიდრე კვლევის სხვა რეგიონებში, ნაადრევი ქორწინებაა. თუმცა რეგიონში არ გამოკვეთილა ქუჩაში მცხოვრები და მომუშავე ბავშვების პრობლემა, რომელიც ხშირია იმერეთში.

კვლევის მიხევით, სამივე რეგიონში ბავშვთა მიმართ ძალადობის ყველა ფორმას მაღალი მაჩვენებელი აქვს. იკვეთება, როგორც ფიზიკური, ფსიქოლოგიური ძალადობა, ასევე ბულინგის შემთხვევები, რაც ქვეყნის მასშტაბით 80%–ს აღწევს.

[თაკო ფეიქრიშვილი, ახალციხე]