საქართველოში ბავშვთა მიმართ ძალადობის შემთხვევები ხშირია

დისკუსია ახალციხის დემოკრატიული ჩართულობის ცენტრისა და არასამთავრობო ორგანიზაცია ”სამცხე-ჯავახეთის დემოკრატ ქალთა საზოგადოების” ხელმძღვანელის მარინა მოდებაძის ინიციატივით გაიმართა.

2007 წელს საქართველოში ჩატარდა ძალადობის ეროვნული კვლევა, რომელიც შეისწავლიდა ბავშვთა მიმართ განხორციელებული ძალადობის ფორმებს ოჯახში, ინსტიტუტებსა და სკოლებში.

კვლევის მიხედვით, საქართელოში ბავშვთა მიმართ ძალადობის შემთხვევები საკმაოდ ხშირია. პატარები ძალადობას განიცდიან, როგორც თანატოლების, ისე მოზარდებისგან.

საქართველოში ბავშვთა მიმართ ძალადობის ფორმებიდან ყველაზე მეტად გვხვდება ემოციური ძალადობა, რომელსაც ფსიქოლოგიურ ძალადობასაც უწოდებენ (59%); გავრცელების მხრივ მეორე ადგილზე ფიზიკური ძალადობაა (54%); მესამე ადგილზე კი – სექსუალური ძალადობა (8%).

”ჩემი აზრით კაცი ძალადობს მაშინ, როცა გრძნობს თავის სისუსტეს. ჩვენთან ძალადობის შემთხვევები მაღალმთიან რაიონებში უფრო ხშირია. გამოსავალს საზოგადოების ინფორმირებულობის გაზრდაში ვხედავ, ეს ფილმი ყველა მამაკაცმა უნდა ნახოს. სკოლაში კი ოჯახურ ძალადობასთან დაკავშირებული გაკვეთილები ფილმთან ერთად უნდა განიხილებოდეს, რათა უფრო მეტი ემოციური დატვირთვა ქონდეს მოზარდებში”,- განაცხადა პირველი საჯარო სკოლის ისტორიისა და სამოქალაქო განათლების მასწავლებელმა ნინო ნადირაძემ.

შეხვედრაზე აჩვენეს არასამთავრობო ორგანიზაციის „სახლის“ მიერ მოწოდებული ფილმი ოჯახური ძალადობის შესახებ და ასევე, ძალადობის მსხვერპლთათვის განკუთვნილი ცხელი ხაზის სარეკლამო რგოლები.

[თინათინ ზაზაძე, ახალციხე]