სამუშაო შეხვედრა სამცხე-ჯავახეთის რეგიონის მთავრობის წარმომადგენლებთანახალციხისა და ადიგენის სოფლებში გამგებლის წარმომადგენლების უფლება–მოვალეობებს ერთი პუნქტი დაემატა. მათ სოფლებში ბავშვების პრობლემების პირველადი იდენტიფიცირება უნდა მოახდინონ და არსებული შემთხვევების შესახებ ინფორმაცია გამგეობებს, უფრო ზუსტად კი გამგეობებში სოციალურ სამსახურებს მიაწოდონ.
აღნიშნული ცვლილება გამგებლის წარმომადგენლების უფლება–მოვალეობებში არასამთავრობო ორგანიზაცია „world vision- საქართველოს“ ინიციატივით შევიდა.
„ჩვენი მთავარი ამოცანა ბავშვთა კეთილდღობის გაუმჯობესებაა, მაგრამ რამდენიმე წელში „ვორლდ ვიჟენი“ გავა რეგიონიდან და გვინდა არსებობდნენ შესაბამისი პირები, რომლებიც ბავშვთა უფლებების დარღვევის შესახებ ამბავს მიიტანენ ამა თუ იმ უწყებამდე“, – ამბობს „world vision- საქართველოს“ – სამცხე–ჯავახეთის სამხარეო განვითარების პროგრამის მენეჯერი ნინო ლომიძე.
მისი თქმით, ბავშვთა პრობლემები სოფლებში ხშირად ყურადღების მიღმა რჩება: „არიან სოციალური მუშაკები, მაგრამ ათობით სოფელს მხოლოდ ერთი მათგანი ემსახურება და შეუძლებელია ყველაფრის შესახებ საქმის კურსში იყოს. გარდა ამისა, ჩვენც გვყავს ჩვენი წარმომადგენლები სოფლებში ამჟამად, ვინც ბავშვების პრობლემების შესახებ საქმის კურსში გვაყენებენ, მაგრამ როცა ჩვენ აღარ ვიქნებით, ეს საკითხები ყურადღების მიღმა დარჩება“.
ამიტომ ორგანიზაციამ ამ მიმართულებით სოფლებში გამგებლების წარმომადგენლების ჩართვა გადაწყვიტა და თვითმმართველობებთან ამ მიზნით მუშაობა დაიწყო. world vision მხოლოდ ადიგენისა და ახალციხის მუნიციპალიტეტებში, უფრო ზუსტად ამ ორი მუნიციპალიტეტის 18 სოფელში მუშაობს. თუმცა, რწმუნებულებს ბავშვთა პრობლემების პირველადი იდენტიფიცირება ყველა სოფელში დაევალათ.
ნინო ლომიძის თქმით, ასე ერთგვარი ჯაჭვი შეიკვრება. პირველ რიგში რწმუნებული ინფორმაციას გამგეობის სოციალურ სამსახურს მიაწვდის: „აღნიშნულ სამსახურში მუშაობს პროგრამები, რომელბიც ბავშვების საჭიროებებს პასუხობენ. თუ რომელიმე მათგანით აღნიშნულ პრობლემას მოაგვარებენ, რეაგირებას მაშინვე მოახდენენ, თუ არა იმ უწყებაში გაგზავნიან შეტყობინებას, რომელიც ასეთ საკითხებზე მუშაობს. ძალადობის შემთხვევაში შესაძლოა ეს შსს იყოს“.
ბავშვთა პრობლემები ქალაქთან შედარებით სოფლებში რომ უფრო ხშირ შემთხვევებში ყურადღების მიღმა რჩება, ამაზე ახალციხის მუნიციპალიტეტის გამგეობაშიც საუბრობენ. ამიტომ გამგებლის პირველი მოადგილე გურამ მელიქიძე ფიქრობს, რომ ამ თვალსაზრისით რწმუნებულების გააქტიურება მნიშვნელოვანია: „რწმუნებულები ყველა ოჯახს იცნობენ, ყველას სახლის კარი შეღებული აქვთ, ამიტომ ყველაზე მეტ ინფორმაციას ფლობენ. დამატებითი რესურსის გამოყენება არ გვიხდება“.
მას ეთანხმება ვალეში გამგებლის წარმომადგენელი ელიოზ ბარბლიშვილი: „რაც მეტი ადამიანის თვალი დაინახავს პრობლემას, მით უკეთესი იქნება. მგონია, რომ ეს მნიშვნელოვანდ გააუმჯობესებს ბავშვების უფლებების დაცვის თვალსაზრისით ჩვენს მუნიციპალიტეტებში არსებულ მდგომარეობას“.
მიუხედავად იმისა, რომ ინიციატივა მისაღებია, გამგეობებში აცხადებენ, რომ მათ წარმომადგენლებს ამ მიმართულებით შესაბამისი ცოდნა არ აქვთ. ამიტომ world vision– ი გამგებლის წარმომადგენლებისა და მათი თანაშემწეების გადამზადებას დაიწყებს.
„ტრენინგებს გაივლიან გამგეობებში სოციალური სამსახურების წარმომადგენლები. ასევე პოლიციის ის თანამშრომლები, რომლებიც არასრულწლოვნების საკითხებზე მუშაობენ“, – ამბობს ლომიძე.
ორგანიზაციას ბავშვთა უფლებების დაცვის მიზნით რეგიონული ჯგუფიც აქვს შექმნილი, რომელშიც აღნიშნული მიმართულებით ბავშვებთან შემხებლობაში არსებული ყველა უწყებისა და სამსახურის წარმომადგენელი ჰყავს ჩართული.
„ახალს არაფერს არ ვქმნით. არსებულ სისტემას ვერგებით და მის გაუმჯობესებას ვცდილობთ. გარკვეულწილად შეიძლება ითქვას, რომ კანონსაც გავუსწარით, რადგან მას შემდეგ რაც რწმუნებულებს ეს დაევალათ, ბავშვთა დაცვის მიმართვიანობის (რეფერირების) პროცედურების დამტკიცების შესახებ ბრძანებაც იქნა მიღებული“, – ამბობს ნინო ლომიძე
რწმუნებულები ახალციხის მუნიციპალიტეტში ბავშვთა პრობლემების იდენტიფიცირებას 45 სოფელსა და ერთ ქალაქში, ადიგენში კი 55 სოფელსა და 2 დაბაში მოახდენენ. ახალციხეში ამისთვის გამგებლის 15 წარმომადგენელი, ადიგენში კი 21 იმუშავებს.
[თამუნა უჩიძე, ახალციხე]