სლოვაკეთის პრეზიდენტმა „ახალციხის ციხე“ დაათვალიერა [Photo]

საქართველოში სახელმწიფო ვიზიტით მყოფი სლოვაკეთის პრეზიდენტი ანდრეი კისკა ახალციხეს საქართველოს პრეზიდენტის მრჩეველთან გიორგი აბაშიშვილთან ერთად ეწვია. სტუმრებს ახალციხის მერმა გიორგი კოპაძემ უმასპინძლა.

„მნიშვნელოვანია შუა ევროპის პრეზიდენტის ვიზიტი ახალციხეში. გვიხარია, რომ ჩვენ ქალაქს ესტუმრა და დრო გამონახა“,– ამბობს ახალციხის მერი გიორგი კოპაძე.

სპეციალურად სლოვაკეთის პრეზიდენტისთვის ახალციხის ფოლკლორულმა ანსამბლმა „მესხეთმა“ სიმღერა მრავალჟამიერი შეასრულა. ასევე, სტუმრებისთვის ციხის ტერიტორიაზე ნახატებისა და ხელნაკეთი ნიმუშების გამოფენა გაიმართა. ისტორიული კომპლექსის დათვალიერების შემდეგ პრეზიდენტმა მესხური ღვინო, პური და ყველი დააგემოვნა. ანდრეი კისკამ ჩურჩხელებიც ამოავლო.

მას მედიასთან კომენტარი არ გაუკეთებია, გიორგი აბაშიშვილის თქმით კი, სლოვაკეთის პრეზიდენტი საქართველოში პირველი ოფიციალური ვიზიტით იმყოფება: „დღეს სამცხე–ჯავახეთის ღირსშესანიშნაობები დაათვალიერა, ხვალ კი ვიზიტი აჭარაში გაგრძელდება“.

დღეს, 31 მაისს, დილიდან ინფორმაცია ვრცელდებოდა, რომ ახალციხეს საქართველო პრეზიდენტი გიორგი მარგველაშვილი ესტუმრებოდა. ქვეყნის პრეზიდენტს ედლოდნენ "ახალციხის ციხეზეც", თუმცა მარგველაშვილის ვიზიტს საჯარო უწყებებსა და პრეზიდენტის ადმინსიტრაციაში არ ადასტურებდნენ.









[ვარლამ წიკლაური, ახალციხე]