პროკურატურის დღე სამცხე–ჯავახეთის საოლქო პროკურატურაში

უნივერსიტეტის წარჩინებულ სტუდენტებს სამცხე–ჯავახეთის ოლქის პროკურორმა მალხაზ კაპანაძემ კოლეგებთან ერთად უმასპინძლა. რეგიონის პირველმა პროკურორმა ახალგაზრდებს უწყების სამუშაო გარემო გააცნო.

„ალბათ ხედავთ, რომ სამუშაო მაგიდებთან სკამების ნაწილი ცარიელია, მათი დაკავება თქვენ შეგიძლიათ“, – უთხრა მალხაზ კაპანაძემ სტუდენტებს და მოუწოდა, რომ სისხლის სამართლის სპეციალიზაციით წავიდნენ, გაიარონ სტაჟირება და პროკურატურაში დასაქმდნენ, – „ჩვენი მიზანია, რაც შეიძლება მეტი ადგილობრივი კადრი დასაქმდეს რეგიონულ პროკურატურაში“.

პროკურატურის დღის ამ ფორმით აღნიშვნა მისი ინიციატივა იყო: „დღევანდელი დღის ფარგლებში გვინდოდა, რომ მომხდარიყო ჩვენი საქმიანობის გამჭვირვალეობა – გასაჯაროვება. ამ მიზნით მოვიწვიეთ სტუდენტები და გვინდა, რომ თავიანთი პროფესიული საქმიანობა პროკურატურას დაუკავშირონ“.

პროკურატურით დღევანდელი დღის შემდეგ უფრო მეტად რომ დაინტერესდება, ამის შესახებ სტუდენტმა ლევან აფციაურმა შეხვედრის დასრულებამდე განაცხადა: „აქამდეც მიფიქრია, მაგრამ ახლა მეტად დავფიქრდები პრკურატურაში სტაჟირებაზე. ძალიან საინტერესო იყო პროკურორებთან ასე უშუალო გარემოში შეხვედრა“.

სისხლის სამართლის მიმართულება ისევე როგორც ლევანს, უკვე არჩეული აქვს თამუნა მურჯიკნელსაც: „ვულოცავ ყველა პროკურორს დღვანდელ დღეს. სტუდენტებისთვის დიდი პატივია , რომ დღეს ჩვენ აქ ვართ“.

სტუდენტები ძალოვან უწყებას იურიდიული ფაკულტეტის დეკანთან მალხაზ ლომსაძესთან ერთად ეწვივნენ. პროფესორმა აქცენტი უნივერსიტეტში მათ ფაკულტეტზე კადრების სიმცირეზე გაამახვილა: „პრაქტიკული უნარჩვევების შესწავლის მიზნით მიწვეული გვყავს გიორგი ბახტაძე (ოლქის პროკურორის მოადგილე). 25 წელია სამცხე–ჯავახეთის უნივერსიტეტი არსებობს და ერთი პროფესორიც კი არ ჰყავთ სამეცნიერო ხარისხის მქონე“.

შეხვედრის დასასრულს ოლქის პროკურორმა იურიდიული ფაკულტეტის დეკანთან და ერთ–ერთ წარჩინებულ სტუდენტთან თამუნა მურჯიკნელთან ერთად, სახელმწიფო გერბით გაფორმებული ტორტი დაჭრა. ასევე, სტუმრებს კაპანაძემ პრკურატურის ბლოკნოტები და კალმები გადასცა.
30 მაისს პროკურატურის დღე საქართველოში 1999 წლიდან აღინიშნება.



[თამუნა უჩიძე, ახალციხე]