საკრებულო ყოფილი ადმინისტრაციული შენობის დაბრუნებას გეგმავს

ახალციხის მუნიციპალიტეტის გამგეობის ყოფილი შენობა შესაძლოა ისევ მუნიციპალიტეტის საკუთრება გახდეს. შპს ”ქროსვეისმა”, რომელმაც მიმდინარე წლის 14 ივლისს, ყოფილი ადმინისტრაციული შენობა სიმბოლურ ფასად, ერთ ლარად იყიდა, ხელშეკრულებით გათვალისწინებული პირობები ვერ შეასრულა.

ახალციხის მუნიციპალიტეტის საკრებულოში ამბობენ, რომ კომპანიამ ხელშეკრულებით გათვალისწინებული თანხა არ გადაიხადა. შეგახსენებთ, რომ ხელშეკრულების თანახმად, კომპანიას პირველ დეკემბრამდე მუნიციპალიტეტის ანგარიშზე 200,000 ლარი უნდა ჩაერიცა, დანარჩენი თანხა კი 2013 წელში უნდა დაეფარა.

გაირკვა ისიც, რომ კომპანიის მიერ არ არის გადახდილი შენობის საპრივატიზებო თანხა ერთი ლარიც. ერთი ლარი კომპანიას ყიდვიდან 30 კალენდარული დღის განმავლობაში უნდა გადაეხადა.

”ქროსვეისს” აღებული ჰქონდა ვალდებულება, რომ 2015 წლამდე შენობაში სასტუმრო და კაზინო გაეკეთებინა. კომპანია ერთი მილიონის ინვესტირებას აპირებდა.

ახალციხის მუნიციპალიტეტის საკრებულოს თავმჯდომარე, ოლეგ სანდროშვილი ამბობს, რომ კომპანიის წარმომადგენლები თვითონ დაუკავშირდნენ და შეხვედრა სთხოვეს.

”რადგან კომპანიამ ხელშეკრულებით ნაკისრი ვალდებულებები არ შეასრულა, შესაბამის სამსახურებს დავავალე მდგომარეობის შესწავლა, რათა დავსვათ შენობის უკან დაბრუნების საკითხი”,- განმარტავს სანდროშვილი.

ყოფილი გამგეობის შენობა და მიმდებარე ტერიტორია 4,632 კვ.მ ფართობს მოიცავს.

”ქროსვეისს” ამ დრომდე მშენებლობა არ დაუწყია. მუნიციპალიტეტის საკრებულოში ფიქრობენ, რომ კომპანია ან არ არის ამ საქმიანობით დაინტერესებული, ან პროექტს არამომგებიანად თვლის.

” წერილი კომპანიის სახელზე უკვე გაგზავნილი გვაქვს. მივეცით გონივრული ვადა, რომ ხელშეკრულებით გათვალისწინებული თანხა დაფარონ, წინააღმდეგ შემთხვევეში, გავწყვეტთ კონტრაქტს და ჯარიმას გადაიხდიან”,-განმარტავს მუნიციპალიტეტის საკრებულოს ფრაქციის ”ქართული ოცნება -ახალციხე” თავმჯდომარე ნუგზარ თამარაშვილი.

ხელშეკრულების თანახმად, კონტრაქტის დარღვევის შემთხვევში კომპანიამ პირგასამტეხლო, ყოველ გადაცილებულ დღეზე 500 ლარი, უნდა გადაიხადოს. საპრივატიზებო თანხას ერთ ლარს კი 0,01 პროცენტი ემატება.

საკრებულოში ამბობენ, რომ მათი სურვილია შენობა მუნიციპალიტეტს საკუთრებაში გადავიდეს.

”გვინდა იმ შენობაში გადავიტანოთ მუსიკალური სკოლა, კულტურის სახლი და სამხატვრო სკოლა. ვგეგმავთ გავაკეთოთ საცეკვაო დარბაზი და გადმოვიტანოთ თოჯინების თეატრი”, - განმარტავს სანდროშვილი.

შპს ”ქროსვეისსა” და მუნიციპალიტეტის საკრებულოს შორის ხელშეკრულება 2012 წელის 14 ივლისს გაფორმდა. კომპანიის მხრიდან წარმომადგენელი მინდობილობის საფუძველზე დავით ვადაჭკორია იყო.

”სამხრეთის კარიბჭემ” არაერთი მცდელობის მიუხედავად ვადაჭკორიასთან დაკავშირება ვერ შეძლო. საკონტაქტო ნომერი, რომელიც ხელშეკრულებაშია მითითებული გამორთულია.

[თინათინ ზაზაძე, ახალციხე]