შესაძლოა თოჯინების თეატრი ძველ ადგილს დაუბრუნდეს

ხუთი თვეა, რაც თოჯინების თეატრი ახალციხის ციხის ტერიტორიაზე გადავიდა. მაყურებლის სიმცირის გამო, თეატრის ხელმძღვანელობამ უკან, ქალაქში დაბრუნებისთვის ადგილობრივ ხელისუფლებას არაერთხელ მიმართა.

თოჯინების თეატრის ხელმძღვანელი რუსუდან სისაური ამბობს, რომ მაყურებლის დაბრუნების მიზნით ამ ნაბიჯის გადადგმა აუცლებელია: ”თოჯინების თეატრი ქალაქში უნდა იყოს. ციხეზე, დარბაზში 40 კაცი ეტევა და ძველ შენობაში კი 200 ადამიანი ეტეოდა. გარდა ამისა, ბაღის ბავშვებისთვის და სკოლის მოსწავლეებისთვის ახალციხის ციხეზე ამოსვლა ტრანსპორტის გარეშე ძალიან რთულია”.

სისაურის თქმით, თეატრის ქალაქში დაბრუნებასთან დაკავშირებით მინიციპალიტეტის საკრებულოს თავმჯდომარეს უკვე ესაუბრა: ”მითხრა, რომ 90 პროცენტით გადაწყვეტილია და საბოლოო პასუხი ერთ კვირაში გვეცოდინებაო”.

შეგახსენებთ, რომ ყოფილი ადმინისტრაციის შენობა, სადაც თოჯინების თეატრი მდებარეობდა და რომელიც მიმდინარე წლის 14 ივლისს გასხვისდა, შესაძლოა ისევ მუნიციპალიტეტს გადაეცეს საკუთრებაში. შპს ”ქროსვეისს” შენობაში სასტუმრო და კაზინო უნდა გაეკეთებინა. იმის გამო, რომ კომპანიამ ხელშეკრულებით ნაკისრი ვალდებულებები არ შეასრულა, მინიციპალიტეტის საკრებულო შენობის უკან დაბრუნებას ითხოვს.

”ვფიქრობ, რომ თეატრის ხელმძღვანელობის მოთხოვნა ლოგიკურია. სწორედ ამიტომ, ყოფილი ადმინიტრაციული შენობის დაბრუნების შემდეგ, თეატრს ძველ ადგილას დავაბრუნებთ”,- განმარტავს მუნიციპალიტეტის საკრებულოს თავმჯდომარე ოლეგ სანდროშვილი.

[თინათინ ზაზაძე, ახალციხე]