ახალციხის საკრებულოს თავმჯდომარე: ”ან იძულების წესით გადაახდევინეს თანხა და ან შეურაცხადია ის, ვინც ეს შენობები იყიდა”

ახალციხის მუნიციპალიტეტის საკრებულოს თავმჯდომარე ოლეგ სადნროშვილი მომხდარს არაბუნებრივ მოვლენას უწოდებს: ”ან იძულების წესით გადაახდევინეს თანხა და ან შეურაცხადია ის, ვინც ეს შენობები იყიდა”.

სანდროშვილი საკრებულოს თავმჯდომარედ გასული, 2012 წლის 9 ნოემბერს დაინიშნა, მანამდე ის საკრებულოს წევრი იყო.

- ”აუქციონს გამგეობა აცხადებდა და ვერ გააკონტროლებდი თუ რატომ გადაიხადა ვიღაცამ შენობაში ამხელა თანხა და რა მოხდა. ყველასთვის ადვილად ხელმისაწვდომი არც იყო ეგ ინფორმაცია”, - ამბობს სანდროშვილი და ამატებს, რომ ბიუჯეტიდან თანხის 95 პროცენტი ახალციხის ციხის რეაბილიტაციისთვის იხარჯებოდა, სხვა მნიშვნელოვანი პრობლემები კი ყურადღების მიღმა რჩებოდა.

ახალციხის მუნიციპალიტეტის საფინანსო-საბიუჯეტო განყოფილების უფროსი გაგა ივანიძე ამბობს, რომ პრივატიზაციიდან შემოსულ თანხას მიზნობრიობა არ გააჩნია: ”თანხა იხარჯებოდა გადასახდელებში. ერთ-ერთი მნიშვნელოვანი და დიდი პროექტი რაბათი იყო. ამას გარდა იყო სხვა პროექტებიც, გზები, წყალსადენები, კორპუსები, ასევე საკანალიზაციო და სანიაღვრე არხები”.

ივანიძის განცხადებით, პრივატიზაციიდან შემოსული თანხა საჭიროებისამებრ იწერებოდა: ”პროექტი მზადდებოდა, შემდეგ ის საკრებულოში მიდიოდა, განიხილებოდა და მტკიცდებოდა”.

ახალციხის მუნიცპალიტეტის საკრებულოს ყოფილი თავმჯდომარე და ახლა საკრებულოს წევრი მალხაზ გიქოშვილი ამბობს, რომ მაშინ თანხის დიდი ნაწილი ახალციხის ციხის რეაბილიტაციაზე იხარჯებოდა.

კითხვაზე თუ რამდენად გონივრული იყო, ნახევრდდანგრეული შენობების ყიდვა მილიონობით ლარად, გიქოშვილი გვპასუხობს, რომ არ იცის: ”ზოგი რა ხასიათზეა, რას გაიგებ! არ ვიცი. რაც უფრო მეტს გადაიხდიდნენ, მით უკეთესი იყო ჩვენთვის”.

ის, რომ აღნიშნუილ ობიექტები ამ დრომდე მიტოვებულია, ამჟამინდელ საკრებულოს თავმჯდომარეს, სანდროშვილს არწმუნებს იმაში, რომ მათ მყიდველებს ამ შესყიდული შენობების გამოეყენება ინვესტირებისთვის არ უნდოდათ.

[თამუნა უჩიძე, ახალციხე]