ახალციხის მუნიციპალიტეტმა ცენტრალურ ბიუჯეტში 134 000 ლარი დააბრუნა

ახალციხის მუნიციპალიტეტმა ცენტრალურ ბიუჯეტში 134 434 ლარი დააბრუნა. ადგილობრივი თვითმმართველობის ინფორმაციით, თანხა ინფრასტრუქტურული პროექტების განხორციელებისას დაიზოგა. კერძოდ, საგზაო ინფრასტრუქტურის თანხა 68 558 ლარით, ხოლო წყლისა და საკანალიზაციო ქსელის რეაბილიტაცია 65 874 ათასი ლარით შემცირდა.

თანხა დაიზოგა ადგილობრივ ბიუჯეტშიც.

დასუფთავების ღონისძიებებში, ბუნკერების შესაძენად გამოყოფილი თანხიდან 2 000 ლარი მორჩა; 20 000 ლარით შემცირდა სკოლამდელი აღზრდის დაწესებულებების ხარჯები; 14 000 ლარი დაიზოგა სახურავების მოწყობა–რეაბილიტაციისას.

ამ და სხვა მიმართულებით დაზოგილმა თანხამ მთლიანობაში 90 000 ლარი შეადგინა, რომელიც თვითმმართველობის ინფორმაციით, ინფრასტრუქტურული პროექტების განხორციელებისთვის გადანაწილდა.

გამგეობაში განმარტავენ, რომ თანხის დაზოგვა ტენდერების ხარჯზე მოხდა, შემსყიდველებმა პროექტები უფრო ნაკლებ ფასად შეისყიდეს, ვიდრე ტენდერზე იყო დადებული.

"ეს ჯანსაღი ტენდერის წესია, მშენებლები იღებენ მონაწილეობას და თანხას თავად ასახელებენ. გამარჯვებული სამუშაოებს ახორციელებს, ამან გამოიწვია თანხის დაზოგვა, რომლიც მთავრობის განკარგულებით მოიხსნა“,– განმარტავს ახალციხის გამგეობის საფინანსო–საბიუჯეტო სამსახურის უფროსი გელა ლომიძე.

ცენტრალური და ადგილობრივ ბიუჯეტებიდან დაზოგილი თანხის ოდენობას ეჭვქვეშ აყენებს "ნაციონალური მოძრაობის“ დეპუტატი მაკა სუდაძე.

"როგორ შეიძლება 65 000 ლარი ეკონომია დარჩეს გზების რეაბილიტაციის დროს?! აქ ან ხარისხში გავქვს საქმე, ან გარიგებაში, ან სხვა რამეა. მეორე ჩემი პროტესტი გამოიწვია ბაღებში თანხების შემცირებამ და აქაც მითხრეს, რომ ტენდერის გამოა. მე არ მჯერა, რომ ჩვენი ბავშვები ისეთ პირობებში იმყოფებიან და ისე იკვებებიან, რომ გამოცხადეულ ტენდერში ეკონომია დარჩეს, აქაც დაგეგმვაშია პრობლემა“, – ამბობს დეპუტატი.



[თაკო ფეიქრიშვილი, ახალციხე]