სომხური სკოლა ქართველი მწერლების მასპინძლის როლში

მწერლებმა ვასილ გულეურმა, ირაკლი შამათავამ, ცირა ბარბაქაძემ, შარლოტა კვანტალიანმა და ნატო დავითაშვილმა, დღეს, 25 მაისს, საკუთარი შემოქმედება სოფელ სხვილისის სომხურენოვანი სკოლის მოსწავლეებს გააცნეს.

მოსწავლეებმა მწერლებს მათ მიერ დაწერილი ლექსები ქართულ ენაზე წაუკითხეს და სპეციალურად მათთვის მესხური სიმღერა „მუმლი მუხასაო“ შეასრულეს.

„დღევანდელი დღით აღფრთოვანებული ვარ. ეს არის უნიკალური სკოლა, აქ ყველა იღიმის, ღიმილი კი, ყველაზე დიდი პოეზიაა. მადლობა ქართულის მასწავლებლებს, რომ ქართულს ასე ასწავლიან ბავშვებს“, – განაცხადა მწერალმა ცირა ბარბაქაძემ.

სხვილისის საჯარო სკოლაში პოეტების მიწვევა სკოლის დამხმარე პედაგოგის მარეხ ტატალაშვილის იდეა იყო.

„დარწმუნებული ვარ, რომ ამის შემდეგ სკოლის მოსწავლეებს ქართული ენის მიმართ მეტი დაინტერესება ექნებათ“, – ამბობს იგი.

ამ ვიზიტით მწერლებმა სამცხე–ჯავახეთის შემოვლა დაასრულეს.

„ცოცხალი წიგნები“ საქართველოს კულტურისა და ძეგლთა დაცვის სამინისტროს პროექტია. იგი 2015 წლის, 14 აპრილს ქართული ენის დღეს დაიწყო, მიმდინარე წელს მისი მეორე ეტაპი ხორციელდება.

პროექტის ფარგლებში, თანამედროვე მწერალთა მობილური ჯგუფები ქვეყნის მასშტაბით სხვდასხვა რეგიონში მოგზაურობენ და მკითხველებს ხვდებიან.

სამცხე–ჯავახეთს მწერალთა ჯგუფი 22 მაისს ესტუმრა. ამ დღეს შეხვედრები სოფელ აწყურსა და ქალაქ ვალეში შედგა. 23 მაისს მწერლებს ადიგენმა, დაბა აბასთუმანმა და ქალაქ ახალციხემ უმასპინძლა. 24 –ში მწერლები მკითხველებს ასპინძასა და ახალქალაქში შეხვდნენ.



[ვარლამ წიკლაური, ახალციხე]