'ცოცხალი წიგნები' სამცხე–ჯავახეთში

23 მაისს, ახალციხეს, მწერლები ვასილ გულეური, ირაკლი შამათავა, ცირა ბარბაქაძე, შარლოტა კვანტალიანი, მარიამ წიკლაური და ნატო დავითაშვილი ესტუმრნენ. ისინი მკითხველებს საკუთარი შემოქმედებისა და ლიტერატურის სხვადასხვა ჟანრების შესახებ უყვებოდნენ.

ლიტერატურულ–საგანმანათლებლო პროექტი "ცოცხალი წიგნები" საქართველოს კულტურისა და ძეგლთა დაცვის სამინისტროს პროექტია. იგი 2015 წლის, 14 აპრილს ქართული ენის დღეს დაიწყო, მიმდინარე წელს მისი მეორე ეტაპი ხორციელდება.

პროექტის ფარგლებში, თანამედროვე მწერალთა მობილური ჯგუფები ქვეყნის მასშტაბით სხვდასხვა რეგიონში მოგზაურობენ და მკითხველებს ხვდებიან.

"გვინდა რომ იყოს მრავალრიცხოვანი შეხვედრები, მაგრამ რატომღაც რეგიონებში შეხვედრაზე მხოლოდ 20–25 ადამიანი მოდის და გული გვწყდება. ჩვენი სახელმწიფო ფულს ხარჯავს, რომ ეს შეხვედრები შედგეს და რაც უფრო მრავალრიცხოვანი იქნება, მით უკეთესი“, – ამბობს პროექტ "ცოცხალი წიგნების“ კოორდინატორი, მარიამ წიკლაური.

მკითხველებთან შეხვედრის გარდა, მწერალთა მობილურმა ჯგუფმა ახალციხეში წიგნებიც ჩამოიტანა. საგამავრცელებლო კომპანია "ირიათონმა" ბიბლიოთეკაში წიგნის პატარა ბაზრობა მოაწყო.

"რაიონებში თითქმის არ არის წიგნის მაღაზიები, ამიტომ თანამედროვე ავტორების წიგნები ყველაგან დაგვაქვს. მათი შეძენა შეხვედრებზე მკითხველს საგამომცემლო ფასით შეუძლია“,– განმარტა პროექტის კოორდინატორმა.

პროექტ "ცოცხალი წიგნების“ ფარგლებში მწერალთა ხუთ კაციანი ჯგუფი სამცხე–ჯავახეთის მასშტაბით უკვე იმყოფებოდა აწყურში, ვალეში, ადიგენსა და ახალციხეში.

24 მაისს ისინი ახალქალაქისა და ასპინძის სკოლის მოასწავლეებს შეხვდებიან. 25 მაისს კი მწერლებს სოფელი სხვილისის სომხური სკოლა უმასპინძლებს.



[თაკო ფეიქრიშვილი, ახალციხე]