‘ვბრუნდებით თბილისში, სავსე შთაბეჭდილებებით’ – მწერლები სამცხე–ჯავახეთზე

მწერლები ვასილ გულეური, ირაკლი შამათავა, ცირა ბარბაქაძე, შარლოტა კვანტალიანი, მარიამ წიკლაური და ნატო დავითაშვილი სამცხე–ჯავახეთის მკითხველს საკუთარ შემოქმედებას რამდენიმე დღე აცნობდნენ. მათ სამცხე–ჯავახეთის ყველა მუნიციპალიტეტი მოიარეს.


ვასილ გულეური საბავშვო მწერალია. მისი მკითხველები უმეტესად სასკოლო ასაკის მოსწავლეები არიან. ვასო ამბობს, რომ მასზე განსაკუთრებული შთაბეჭდილება ახალციხის მუნიციპალიტეტის სოფელ სხვილისის სკოლის მოსწავლეებმა მოახდინეს.

„სხვილისში განსაკუთრებით ამაღელვებელი დღე იყო. ძირითადად ჩემი მკითხველები ბავშვები არიან და განსაკუთრებით მათთან შეხვედრა მიხარია. სკოლის ქართულის პედაგოგმა ერთხელ ტელეფონითაც კი მომასმენინა სომეხი ეროვნების ბავშვები როგორ კითხულობდნენ ჩემს ლექსებს“, –ამბობს მწერალი და ამატებს, რომ ამ რეგიონის განსაკუთრებულობა და სიმდიდრე სწორედ მისი ეთნიკური მრავალფეროვნებაა.


„ყველაზე ძალიან თვალში რაც მომხვდა ამ მხარეში, ის არის, რომ მხარეს სჭირდება მეტი წიგნის მაღაზია“, – გვეუბნება ნატო დავითაშვილი და ამატებს, – „ცოტა მეტი მიხედვა სჭირდება ამ საკითხებს. უბედნიერესი ვარ აქ მოხვედრით, ამ ბუნებამ და ამ სივრცემ კიდევ ერთხელ დამარწმუნა, რომ თუ სწორი გზით ვივლით, ძალიან ღონიერები ვიქნებით“.



ცირა ბარბაქაძე ამბობს, რომ სამცხე–ჯავახეთი, თავისი პეიზაჟებითა და ადამიანებით, მისტიური ადგილია: „გაერთიანებული ხარ ბუნებასთან. ახლოს არის ცა და მთა. ეს არაა უბრალო შეხვედრები ეს არის შემოქმედთა გასვლა და კარგი დამუხტვა. მუხტი, რაც ამ რეგიონს აქვს, სრულიად გამორჩეულია“.

სტუმრები ამბობენ, რომ უკან შთაბეჭდილებებით სავსეები მიემგზავრებიან.

„სამცხე–ჯავახეთი გამორჩეულია თავისი ბუნებით, ისტორიული ძეგლებითა და ადამიანებით“, – გვეუბნება პროექტის კოორდინატორი, მწერალი მარიამ წიკლაური.


მისი თქმით, მან მოისმინა საკუთარი ლექსები სკოლის მოსწავლეების შესრულებით, რამაც ძალიან გაახარა: „გვინდა რაც შეიძლება მეტი ადამიანი იყოს ჩვენი მონაწილე. გვინდა, რომ ამ მხარეს ჰქონდეს ის ძალა, რაც საქართველოს ძლიერებისთვის არის ძალიან მნიშვნელოივანი. მე მოვისმინე ჩემი ლექსები და გაოცებული დავრჩი. ამ ბავშვებში დიდი ქართული სული ცოცხლობს. იმედიანად მივდივართ აქედან“.

„ცოცხალი წიგნები“ საქართველოს კულტურისა და ძეგლთა დაცვის სამინისტროს პროექტია. იგი 2015 წლის, 14 აპრილს, ქართული ენის დღეს დაიწყო, მიმდინარე წელს მისი მეორე ეტაპი ხორციელდება.

პროექტის ფარგლებში, თანამედროვე მწერალთა მობილური ჯგუფები ქვეყნის მასშტაბით სხვდასხვა რეგიონში მოგზაურობენ და მკითხველებს ხვდებიან.

სამცხე–ჯავახეთს მწერალთა ჯგუფი 22 მაისს ესტუმრა. ამ დღეს შეხვედრები სოფელ აწყურსა და ქალაქ ვალეში შედგა. 23 მაისს მწერლებს ადიგენმა, დაბა აბასთუმანმა და ქალაქ ახალციხემ უმასპინძლა. 24 –ში მწერლები მკითხველებს ასპინძასა და ახალქალაქში შეხვდნენ. დღეს, 25 მაისს, მათი სტუმრობა რეგიონში სხვილისის სომხურ სკოლაში გამართული შეხვედრით დასრულდა.

[ვარლამ წიკლაური, ახალციხე]