ახალციხეში მოსახლეობის ნაწილს ელექტროენერგია არ მიეწოდება

როგორც „ენერო–პრო–ჯორჯიას“ საზოგადოებასთან ურთიერთობის სამსახურში აცხადებენ,ელექტროენერგიის გარეშე ახალციხეში 1000–მდე აბონენტია დარჩენილი.

„ავარიული გათიშვაა, ჯგუფები გასულები არიან ადგილებზე და ძალიან მალე აღდგება დენის მიწოდება“, – აცხადებენ „ენერო–პრო–ჯორჯიაში“.
ახალციხესთან ერთად, ამ დროისთვის ელექტროენერგია არ აქვს ახალქალაქში, 500–მდე აბონენტსაც.

შეგახსენებთ, დღეს, 23 მაისს, დაახლოებით 19:40 საათზე, ახალციხეში, თამარაშვილის ქუჩაზე მდებარე რვასართულიან საცხოვრებელ კორპუსს, ძლიერმა ქარმა სახურავი ნაწილობრივ გადახადა. შემთხვევის შედეგად არავინ დაშავებულა. დაზიანდა საცხოვრებლის ეზოში მდგარი ავტომანქანები, ისინი სახურავის ნარჩენების ქვეშ მოჰყვა. გადახდილი სახურავიდან წვიმა ჩავიდა მერვე და მეშვიდე სართულებზე მცხოვრებლებთან.

შემთხვევის ადგილზე იმყოფებიან სამცხე–ჯავახეთის სამხარეო ადმინისტრაციის, ახალციხის მერიისა და გამგეობის წარმომადგენლები.

ამ დროისთვის თამარაშილის ქუჩაზე სამაშველო სამსახური მუშაობს.



[თამუნა უჩიძე, ახალციხე]