სკოლებში გამოსაშვები გამოცდები მიმდინარეობს

ახალციხის მეექვსე საჯარო სკოლაში ქართული ენისა და ლიტერატურის გამოცდა ყველაზე ადრე დასრულდა. ტესტირება 18–მა მოსწავლემ გაიარა. სკოლის დირექტორი გია კაპანაძე ამბობს, რომ გამოცდა ყველა მათგანმა წარმატებით ჩააბარა: „ყველა კარგი შედეგებით გამოვიდა, მედალოსნები მივიდნენ 9.9 ქულამდე, დააკლდათ მეათედები ათი ქულა რომ აეღოთ“.

გამოსაშვები გამოცდები პირველი საჯარო სკოლის მოსწავლეებისთვისაც მეექვსე საჯარო სკოლის შენობაშივე გაიმართა. ტესტირებიდან გამოსული მე–12 კლასელები ამბობენ, რომ საკითხები ძირითადად გრამატიკიდან იყო, მცირე ნაწილი კი ლიტერატურიდან.
იმისთვის, რომ გამოცდა ჩაბარებულად ჩაითვალოს, მოსწავლემ 5.5 ქულიანი ბარიერი უნდა გადალახოს.

,,დაახლოებით 40–მდე კითხვას ვუპასუხე. კითხვების ძირითადი ნაწილი ლექსებს და პოემებს შეეხებოდა. ძალიან ბევრი კითხვა იყო გრამატიკიდან“ –ამბობს პირველი სკოლის მოსწავლე მაირიამ სალაღაია.

ახალციხის მე–3 სომხურენოვანი სკოლის მოსწავლეებისთვის, გრამატიკასთან ერთად, რთული აღმოჩნდა ტექსტის გააზრების ნაწილი.

„ჩემთვის რთული იყო, რადგან დიდი ტექსტიდან ბევრი სიტყვის მნიშვნელობა არ ვიცოდი. მაგრამ მაინც 8 ქულა მივიღე და კმაყოფილი ვარ“– ამბობს სარქის ჰაიკანოში.

სომხურენოვანი სკოლის მოსწავლეებმა ქართულ სკოლებთან შედარებით განსხვავებული ტესტები ჩააბარეს.

"ეს მოსწავლეები ქართულ ენას სხვა პროგრამით სწავლობენ, ამიტომ საკითხები ლიტერატურიდან თითქმის არ არის, გრამატიკული სავარჯიშოები კი ხშირია. ტესტებში არის ტექსტის გააზრება, რომელიც დიდი მოცულობისაა და წაკითხვა ეზარებათ ხოლმე, სხვა მხრივ კმაყოფილი ვარ“– განმარტავს, ,,ქართული, როგორც მეორე ენის“ პედაგოგი ირმა გვიშიანი.

ქართულ ენასა და ლიტერატურაში გამოსაშვები გამოცდების საბოლოო შედეგები 14:00 საათის შემდეგ გახდება ცნობილი.
გამოცდის ჩაბარების შესაძლებლობა დღის მეორე ნახევარში იმ მოსწავლეებსაც შეეძლებათ, რომლებმაც გასულ წლებში გეოგრაფიის საგანში ბარიერი ვერ გადალახეს.



[თაკო ფეიქრიშვილი, ახალციხე]