ახალციხის მერი TI-ს კვლევაზე: ‘ბევრი კვლევებით მე პირველ ადგილზე ვარ’

მოქალაქეების მოწონებას გამგებლები უფრო იმსახურებენ, ვიდრე მერები: გამოკითხულთა 15% ფიქრობს, რომ მის ინტერესებს მუნიციპალიტეტის გამგებელი გამოხატავს მაშინ, როცა მერთან დაკავშირებულ ამავე კითხვაზე გამოკითხულთა მხოლოდ 13%-მა გასცა დადებითი პასუხი, – ასეთი შედეგი “საერთაშორისო გამჭვირვალობა - საქართველომ” 2016 წლის 16-28 მარტს მთელი ქვეყნის მასშტაბით გამართული გამოკითხვით მიიღო, რომელიც ორგანიზაციის დაკვეთით, “კავკასიის კვლევითი რესურსების ცენტრმა” (CRRC) ჩაატარა. გამოკითხვაში მონაწილეობა 2032 ადამიანმა მიიღო.

ახალციხის მერი გიორგი კოპაძე ამბობს, რომ ამ კვლევის შესახებ ინფორმაცია არ აქვს.

„არც გამიგია, მაგრამ მე ვიცი, რომ ბევრი კვლევებით მე პირადად პირველ ადგილზე ვარ“, აცხადებს ახალციხის მერი.

შეგახსენებთ, კვლევის შედეგები გუშინ, 17 მაისს გამოქვეყნდა. ამ კვლევის შედეგების მიხედვით,გამოკითხულთა 40% ფიქრობს, რომ მოქალაქეთა ინტერესებს არც ადგილობრივი თვითმმართველობის ორგანოები და არც საქართველოს პარლამენტში მაჟორიტარი დეპუტატები არ გამოხატავენ.

[ვარლამ წიკლაური, ახალციხე]