NDI: 58%–მა არ იცის ვინ არის მისი მაჟორიტარი დეპუტატი

ეროვნულ-დემოკრატიული ინსტიტუტის (NDI) მიერ გამოკითხულთა 58% ამბობს, რომ ვინ არის მისი მაჟორიტარი დეპუტატი საქართველოს პარლამენტში, არ იცის. აღსანიშნავია, რომ ასევე 58%–მა არ იცოდა ვინ იყო მისი მაჟორიტარი 2015 წლის აპრილში ჩატარებული კვლების მიხედვითაც. 31%–მა კითხვას სწორი პასუხი გასცა, 11%–მა არასწორი, 1%–მა კი კითხვაზე პასუხის გაცემაზე უარი განაცხადა.

რაც შეეხება უმცირესობათა დასახლებებს, აქ კითხვაზე – ვინ არის თქვენი მაჟორიტარი დეპუტატი საქართველოს პარლამენტში, სწორი პასუხი 25%–მა გასცა, არასწორი 17%–მა, 55%–მა კი განაცხადა, რომ არ იცის.



2012 წლის ნოემბრის კვლევის მიხედვით, გამოკითხულთა 55%–ს მოლოდინი ჰქონდა, რომ მათი რაიონების მაჟორიტარი დეპუტატები პარლამენტში მათ ინტერესებს დაიცავდნენ; 54% ფიქრობდა, რომ მისი მაჟორიტარი პარლამენტში აქტიური იქნებოდა, 47% აცხადებდა, რომ მაჟორიტარი იმას გააკეთებდა რასაც პარტია ეტყოდა და 15% ფიქრობდა, რომ საკანონდებლო ორგანოში ის მხოლოდ საკუთარ ინტერესებს დაიცავდა.

2016 წლის მარტის კვლევის მიხედვით, 68% ფიქრობს, რომ მაჟორიტარი იმას გააკეთებს რასაც პარტია ეტყვის; 64% ამბობს, რომ ის მხოლოდ თავის ინტერესებს დაიცავს და 24% ელოდება, რომ მაჟორიტარი მის ინტერესებს დაიცავს.



როგორც ქართულ ენოვან მოსახლეობაში, ასევე უმცირესობათა დასახლებებში შეკითხვაზე: მიგიმართავთ თუ არა რომელიმე პარლამენტის წევრისთვის, ან მისი ბიუროსთვის რაიმე საკითხთან დაკავშირებით , 2012 წლის საპარლამენტო არჩევნების შემდეგ, უმრავლესობის პასუხია – არა. უფრო ზუსტად, 6% ამბობს, რომ მიუმართავს; 92% ამბობს, რომ არ მიუმართავს და 1% ამბობს, რომ არ იცის.

რაც შეეხება უმცირესობათა დასახლებებს, პარლამენტარისთვის მხოლოდ 9% მიუმართავს; 83%–ს არა, 7%–მა კი არ იცის;

იმ 6%–დან, ვინც ამბობს, რომ პარლამეტის რომელიმე წევრს, ან მის ბიუროს მიმართა, 56% აცხადებს, რომ პასუხი მიიღო, 44% კი ამბობს, რომ ვერ მიიღო.

2012 წლის საპარლამენტო არჩევნების შემდეგ პარლამენტის წევრები რომელიმე ამომრჩეველს თითქმის არასდროს დაკავშირებიან. ამ შეკითხვაზე როგორც ქართულ ენოვან ასევე სომხურენოვან დასახლებებში უარყოფითი პასუხი 97%–ია. მხოლოდ 2% აცხადებს, რომ მას პარლამენტის წევრი დაუკავშირდა, 1% ამბობს რომ არ იცის;

გამოკითხვა 2016 წლის 23 თებერვლიდან - 14 მარტის პერიოდში, საქართველოს მასშტაბით 3,900 პირისპირ ინტერვიუს წარმომადგენობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან მოსახლეობას შორის ჩატარდა. კვლევაში საშუალო ცდომილების ზღვარი არის +/- 1,6%. NDI-ის კვლევებს აფინანსებს შვედეთის საერთაშორისო თანამშრომლობის განვითარების სააგენტო (Sida) და ატარებს CRRC-საქართველო.

[თამუნა უჩიძე, ახალციხე]