NDI: 48% ფიქრობს, რომ პარლამენტარები მხოლოდ საკუთარ ინტერესებს დაიცავენ

დღეს, 18 იანვარს, ეროვნულ-დემოკრატიულმა ინსტიტუტმა (NDI) და CRRC–საქართველომ 2016 წლის ნოემბერ-დეკემბერში ჩატარებული საზოგადოებრივი აზრის კვლევის შედეგების მეორე, პოლიტიკური ნაწილი ნაწილი წარადგინა.

ეროვნულ–დემოკრატიული ინსტიტუტისა (NDI) და მისი პარტნიორი ორგანიზაცია CRRC–საქართველოს მიერ წარმოდგენილი საზოგადოებრივი აზრის უახლესი კვლევის შედეგების თანახმად, გამოკითხულთა 65%–მა იცის ვინ არის მისი მაჟორიტარი დეპუტატი პარლამენტში, 8%–მა არ იცის, 25%–მა კი კითხვაზე არასწორი პასუხი გასცა.

გამოკითხულთა 65% ფიქრობს, რომ პარლამენტის წევრი იმას გააკეთებს, რასაც პარტია ეტყვის; 56% ელოდება, რომ აქტიური იქნება და 48% ამბობს, რომ ის მხოლოდ თავის ინტერესებს დაიცავს. აღსანიშნავია, რომ 2012 წლის ნოემბრის არჩევნების შემდგომი კვლევის თანახმად, მხოლოდ 15% ამბობდა, რომ მისი მაჟორიტარი დეპუტატი მხოლოდ თავის ინტერესებს დაიცავდა.



NDI-მიერ გამოკითხულთა 42% დარწმუნებულია, რომ მე-9 მოწვევის პარლამენტი უკეთ იმუშავებს, ვიდრე წინა მოწვევის; 30% ფიქრობს, რომ ეს პარლამენტიც იგივენაირად იმუშავებს; 8% კი ელოდება, რომ ეს პარლამენტი წინა მოწვევის პარლამენტზე უარესი იქნება. ამ კითხვაზე პასუხი გამოკითხულთა 19%–ს არ აქვს.



გამოკითხულთა მხოლოდ 19% ეთანხმება მოსაზრებას, რომ პარლამენტის წევრები გაითვალისწინებენ მისნაირი ადამიანების შეხედულებებს; 43% ამ მოსაზრებას ნაწილობრივ ეთანხმება; 13% საერთოდ, 14% კი ნაწილობრივ არ ეთანხმება.



გამოკითხულთა მხოლოდ მესამედი, 36% ფიქრობს, რომ რომ უნდოდეს, ადვილად შეძლებდა პარლამენტის წევრთან შეხვედრის დანიშვნას, 45% ასე არ ფიქრობს და 19% ამბობს, რომ არ იცის.

პარლამენტის შენობაში შესვლა, გამოკითხულთა მხოლოდ 20%–ის აზრითაა ადვილი, 53% ფიქრობს, რომ ეს ასე არ არის; 28% კი ამბობს, რომ არ იცის.



გამოკითხვა 2016 წლის 4 ნოემბერი-4 დეკემბრის პერიოდში, საქართველოს მასშტაბით 3,141 პირისპირ ინტერვიუს წარმომადგენობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან მოსახლეობას შორის ჩატარდა (ოკუპირებული ტერიტორიების გამოკლებით). კვლევაში საშუალო ცდომილების ზღვარი არის +/- 1,8%. NDI-ის კვლევებს აფინანსებს შვედეთის საერთაშორისო თანამშრომლობის განვითარების სააგენტო (Sida) და ატარებს CRRC-საქართველო.

[ნინო ნარიმანიშვილი, ახალციხე]