ადიგენში მომხდარი ავარიის დროს, საჭესთან საპატრულო პოლიციის თანამშრომელი იჯდა

მთავარი → სიახლე, საზოგადოება, სამართალი 30.04.2019

ადიგენში, სოფელ ბენარაში, 29 აპრილს, საღამოს მომხდარი ავარიის დროს, "მერსედესის" მარკის ავტომობილს სამცხე–ჯავახეთის საპატრულო პოლიციის თანამშრომელი მართავდა. შემთხვევის შედეგად ხუთი პირი, მათ შორის ორი მცირეწლოვანი ბავშვი დაშავდა.

ადიგენში მომხდარი ავარიის დროს, საჭესთან საპატრულო პოლიციის თანამშრომელი იჯდა

საპატრულო პოლიციის თანამშრომელი ვარხნის მკვიდრია. როგორც "სამხრეთის კარიბჭესთან" ფაქტის თვითმხილველი ყვება, იგი ამ დროს თავისი კუთვნილი მანქანით სასაფლაოდან შინ ბრუნდება და ალკოჰოლის ზემოქმედების ქვეშ იყო.

შინაგან საქმეთა სამინისტროში ადასტურებენ, რომ "მერსედესის" მძღოლი სამცხე–ჯავახეთის საპატრულო პოლიციის თანამშრომელია.

შეკითხვაზე, რა აჩვენა ალკოტესტმა და იყო თუ არა ის ნასვამ მდგომარეობაში, გვპასუხობენ, რომ "შესაბამისი ექსპერტიზები დანიშნულია და გამოძიება მიმდინარეობს. მას შემდეგ რაც ექსპერტიზის პასუხები იქნება, გაირკვევა ავარია ვისი ბრალეულობით მოხდა".

შსს მომხდარს სისხლის სამართლის კოდექსის 276–ე მუხლის მეორე ნაწილით იძიებს, რაც ტრანსპორტის მოძრაობის უსაფრთხოების, ან ექსპლუატაციის წესის დარღვევას გულისხმობს.

შემთხვევა, გუშინ, 29 აპრილს საღამოს, სოფელ ბენარაში, აბასთუმნის გადასახვევთან მოხდა. ერთმანეთს საპირისპირო მიმართულებით მოძრავი "ჟიგული" და "მერსედესი" შეეჯახა. შემთხვევის შედეგად მსუბუქად დაშავდა პოლიციის თანამშრომელი. სხვადასხვა სახის დაზიანებები მიიღეს ჟიგულში მსხდომებმა. მათ შორის ორი ხუთწლამდე ბავშვი იყო.

[თამუნა უჩიძე, ადიგენი]