სამცხე–ჯავახეთში ახალი ააიპ–ი ფუძნდება, რომელსაც თანხას ყველა მუნიციპალიტეტი გამოუყოფს

ახალი ააიპ–ის შექმნის აუცილებლობასა და საჭიროებაზე, ქალაქ ახალციხის საკრებულოს დეპუტატებმა დღევანდელ სხდომაზე იმსჯელეს.

„ასპინძის ბაზაზე საბავშვო სარაგბო გუნდი ყალიბდება, ჩვენ, სხვა მუნიციპალიტეტებთან ერთად, წილობრივ მონაწილეობას ვიღებთ. რაგბში სამცხე–ჯავახეთის გუნდის ჩამოყალიბება რეგიონში სპორტის განვითარებას ემსახურება“, – ასე ახსნა ახალი ააიპ–ის დაფუძნებისა და მისთვის თანხის გამოყოფის საჭიროება ახალციხის საკრებულოს თავმჯდომარემ დავით ლომიძემ.

ასპინძის სარაგბო ბაზაზე ჩამოყალიბებულ რაგბის რეგიონულ გუნდში ახალგაზრდებს რეგიონის შვიდივე მუნიციპალიტეტიდან შეკრებენ. თითო მუნიციპალიტეტიდან, რამდენი სპორტსმენი იქნება და რა ასაკობრივი კატეგორიის გუნდი ჩამოყალიბდება, ჯერ ცნობილი არ არის. თუმცა, ცნობილია, რომ თანხა შვიდივე ადგილობრივმა ბიუჯეტმა უნდა გადაიხადოს.

უკვე ცნობლია, რომ ახალციხის და ნინოწმინდის მუნიციპალიტეტები ადგილობრივი ბიუჯეტებიდან 20. 000 ათას ლარს გაიღებენ, ბორჯომის და ადიგენის თვითმმართველობები კი 25. 000-ს. რაც შეეხება ქალაქ ახალციხეს, კითხვაზე, რა თანხას გაიღებს ქალაქის ბიუჯეტი, დავით ლომიძე გვპასუხობს, რომ ამ საკითზე ჯერ არ უმსჯელიათ: „მუნიციპალიტეტის წარმომადგენლები შეიკრიბებიან და თანხებს ერთად განსაზღვრავენ. რასაც შემდგომ საკრებულო დაამტკიცებს“.

მართალია თანხები განსაზღვრული არ აქვთ, მაგრამ, საკრებულოს სხდომაზე ახალი ააიპ–ის დაფუძნების საკითხს კენჭი უკვე უყარეს. საკითხი ერთხმად არ დამტკიცებულა. მიუხედავად ხელმძღვანელობის არგუმენტებისა, უმცირესობა სხვა მუნიციპალიტეტში დაარსებული ააიპ–ისთვის თანხის გადარიცხვის საჭიროებას ვერ ხედავს.

„ასპინძაში უნდა იყოს კლუბი, რომელიც ახალციხემ უნდა დააფინანსოს?! მე ამის საჭიროებას ნამდვილად ვერ ვხვდები, ახალციხესაც აქვს სპორტული კლუბი და მერიამ ის დააფინანსოს“, – განაცხადა საკრებულოს დეპუტატმა „ერთიანი ნაციონალური მოძრაობიდან“ ზურა სადათიერაშვილმა.

როდის დაფუძნდება ოფიციალურად ასპინძის სარაგბო ბაზაზე, ა(ა)იპ სამცხე–ჯავახეთის რეგიონული სარაგბო კლუბი და როგორი იქნება მისი წესდება, ეს ჯერ ცნობილი არ არის. იმისათვის რომ ააიპ–ი საჯარო რეესტრში დარეგისტრირდეს, რეგიონის შვიდივე მუნიციპალიტეტის საკრებულოს თანხმობაა საჭირო.

[ლუბა გიორგაძე, ახალციხე]