სარაგბო კლუბი ‘ტაო’ უნივერსიტეტს თანამშრომლობას სთავაზობს

პრეზენტაცია, დღეს, 25 მაისს 13:00 საათზე, სამცხე–ჯავახეთის სახელმწიფო უნივერსიტეტში გაიმართა. სარაგბო კლუბ "ტაოს" პრეზიდეტმა ირაკლი გვენეტაძემ კლუბის ჩამოყალიბების ისტორიაზე, რაგბის მნიშვნელობასა და უნივერსიტეტის ბაზაზე, რაგბის სამოყვარულო და საგულშემატკივრო კლუბების ჩამოყალიბების შესახებ ისაუბრა.

გვენეტაძის თქმით, აღნიშნულ თემებზე სამცხე–ჯავახეთის უნივერსიტეტის რექტორთან მოლაპარაკებებს აწარმოებს – "სტუდენტები ყველაზე აქტიური მასაა, გვინდა რომ ვითანამშრომლოთ უნივერსიტეტთან, შევქმნათ ე.წ. "ტაოს" ფან–კლუბი, სამოყვარულო და ასევე შვიდკაცა პროფესიონალების გუნდი".

მისივე თქმით, მნიშვნელოვანია, უნივერსიტეტს რაგბის საკუთარი გუნდი ჰყავდეს და მან საქართველოს უნივერსიტეტებს შორის გამართულ რაგბის ჩემპიონატში მიიღოს მონაწილეობა.

"სამოყვარულო გუნდებიც შეგვიძლია ჩამოვაყალიბოთ, რომლებიც რაგბის ელემენტებით სავსე თამაშს აჩვენებენ. მაგალითად, როგორიცაა თაგ – რაგბი და თაჩ–რაგბი. თაგ–ია, როცა მოთამაშეები ერთმანეთს ქამრებს ართმევენ, ხოლო თაჩ–ია როცა ხელით ეხებიან", – განმარტავს ირაკლი გვენეტაძე.



[მარიამ ბარძიმაძე, ახალციხე]