ახალციხის ციხეს ახალი დირექტორი ჰყავს

ციხის ყოფილმა ხელმძღვანელმა ნოდარ გოროხოვმა, თანამდებობა პირადი განცხადების საფუძველზე დატოვა. გოროხოვი ამბობს, რომ ჯანმრთელობის მდგომარეობის გაუარესების გამო, განცხადება გასული კვირის ხუთშაბათს საკრებულოს თავმჯდომარის ოლეგ სანდროშვილის სახელზე დაწერა.

ოლეგ სანდროშვილის თქმით, ყოფილმა ხელმძღვანელმა გათავისუფლების განცხადება მისი არყოფნის დროს დაწერა: ”თბილისში ვიყავი, რომ ჩამოვედი განცხადება უკვე დაწერილი დამხვდა. 14 დეკემბერს ახალი ხელმძღვანელი, ბესიკ ბლიაძე დაინიშნა”.

საკრებულოში ამბობენ, რომ ვაკანტურ თანამდებობაზე მხოლოდ ერთი განცხადება შევიდა. შეგახსენებთ, რომ, რადგან ახალციხის ციხე არ არის საჯარო სამსახური, მის ხელმძღვენელს ნიშნავს საკრებულოს თავმჯდომარე.

ბესიკ ბლიაძეს, ახალციხის ციხის დირექტორად დანიშვნამდე, ახალციხის მუნიციპალიტეტის გამგებლობა სურდა. მისი დანიშვნის საკითხი აქტიურად განიხილებოდა, თუმცა, საბოოლოოდ, არჩევანი ბესიკ ხითარიშვილზე შეჩერდა.

როგორც ახალციხის ციხის ახალი ხელმძღვანელი ამბობს, ამ ეტაპზე ახალ სამსახურს ეცნობა. იმის გამო, რომ ზამთრის სეზონზე ტურისტების რაოდენობა ძალიან მცირეა, შესაძლებელია თანამშრომლების შემცირება გახდეს საჭირო.

ბესიკ ბლიაძე წარმოშობით ახალციხელია. 1997 წელს დაამთავრა უნივერსიტეტი,1999 წელს კი სამხედრო სავალდებულო სამსახური. 2000 წლიდან თბილისში მოღვაწეობს. ბოლო პერიოდში მუშაობდა სამშენებლო კომპანიაში, რამდენიმე თვის განმავლობაში იყო ავტოშემკეთებელი საწარმოს დირეტქორიც.

[თინათინ ზაზაძე, ახალციხე]