ავარიის დროს დაშავებული ტრაილერის მძღოლის მდგომარეობა სტაბილურია

კლინიკა „იმედი“–ს ინფორმაციით, დაშავებული თურქეთის მოქალაქის სიცოცხლეს საფრთხე არ ემუქრება. კლინიკაში აცხადებენ, რომ შუახნის მამაკაცს სახისა და თავის არეში მრავლობითი დაზიანებები აღენიშნება.

დაშავებულის მკურნალი ექიმის კობა გრიგალაშვილის თქმით, ამ ეტაპზე მისი მდგომარეობა დამაკმაყოფილებელია, თუმცა პაციენტს ნევროლოგიური და კომპიუტერული კვლევის ჩატარება ესაჭიროება.

„პაციენტი უკვე კონტაქტურია და შემთხევის შესახებ საუბრობს. მისი ახლობლები ამბობენ, რომ თურქეთში გადაიყვანენ და იქ გააგრძელებენ დაშავებულის მკურნალობას“,–ამბობს კლინიკა „იმედის“ ქირურგი კობა გრიგალაშვილი.

შეგახსენებთ, ავტოსაგზაო შემთხვევა გუშინ, 17 აპრილს, ახალციხე–ახალქალაქის გზაზე, სოფელ რუსთავთან მოხდა. სატვირთო ავტომობილი მოსახვევში ამოტრიალდა. შემთხვევის შედეგად ტრაილერის მძღოლი დაშავდა.

[ვარლამ წიკლაური, ახალციხე]