ავარიის შედეგად დაშავებული 8 ადამიანიდან ერთის მდგომარეობა მძიმეა

8–ვე დაშავებული გუშინ ახალციხის სამედიცინო დაწესებულებებში გადაიყვანეს, 3 კლინიკა „იმედში“, 5 კი „უნიმედი სამცხეში“.
კლინიკა „იმედის“ ინფორმაციით, მათთან მიყვანილი სამი პაციენტიდან ერთი გუშინ გადაიყვანეს თბილისში, მდგომარეობის სიმძიმის გამო, მეორე კი დღეს უნდა გადაიყვანონ.

„ტრაილერის მძღოლს ჰქონდა ქალა–ტვნის ტრამვა, სახის ძვლების მოტეხილობით და ტვინის შერყევა. გუშინ გადაიყვანეს თბილისში. რაც შეეხება ჩეხეთის მოქალაქეს, მისი მდგომარეობა ძალიან მძიმეა და ისიც თბილისში გადაჰყავთ“, – აცხადებენ კლინიკაში.

„უნიმედი სამცხე – ახალციხის ჰოსპიტალში“ ამბობენ, რომ მათთან მიყვანილი ხუთი პაციენტიდან თბილისში ერთის ტრანსპორტირება გახდა საჭირო, დანარჩენი ოთხი კლინიკაში რჩება.

„სოცოცხლისთვის საშიში მდგომარეობა არცერთს არ აქვს. აქვთ მოტეხილობები და დაჟეჟილობები“,– აცხადებს საავადმყოფოს მფლობელი კომპანიის, „ევექსის“ კოორდინატორი სამცხე–ჯავახეთში ელდარ ალიევი.

შეგახსენებთ, რომ გუშინ 28 აგვისტოს, ახალციხეში ერთმანეთს სამი ავტომანქანა შეეჯახა, რის შედეგად რვა ადამიანი დაშავდა. დაშვდნენ სატვირთოს მძღოლი და ტურისტები.

შსს - ს ინფორმაციით მომხდარზე ძიება სისხლის სამართლის კოდექსის 276 - ე მუხლის პირველი ნაწილით მიმდინარეობს.

[ვარლამ წიკლაური, ახალციხე]