სამცხე-ჯავახეთის უნივერსიტეტის სტუდენტები საყდრისის აფეთქებას აპროტესტებენ

„მსოფლიო ოქროს საწყისი ყოფილა თურმე საყდრისი“, „თქვენ ანგრევთ მსოფლიოს საგანძურს“, „შეაჩერე საყდრისის ნგრევა“, „დღეს საყდრისი ხვალ?!“ - ამ ტრანსფარანტებით, დღეს, 19 დეკემბერს, სამცხე-ჯავახეთის სახელმწიფო სასწავლო უნივერსიტეტის სტუდენტებმა სასწავლებლის ეზოში აქცია გამართეს.

„ვუერთდებით საქართველოს მასშტაბით ყველა უნივერსიტეტს და ვგმობთ საყდრისის აფეთქებას. საყდრისი ძვირფასი საგანძურია და მას არ უნდა ვანადგურებდეთ. უნდა შეაჩერონ იქ უკანონო სამუშაოები“, - ამბობს ისტორიის ფაკულტეტის მეორე კურსის სტუდენტი ნათია ზაზაძე.
სასწავლებლის ეზოში შეკრებილ სტუდენტებს პროფესორ-მასწავლებლებიც შეუერთდნენ.

„საყდრისი დღეს ყველას სატიკვარია. რაც აქ 12 დეკემბერს ვანდალურად გაანადგურეს ეს აღარ უნდა გაგრძელდეს და უნდა შეჩერდეს. ჩვენ ყველა ერთად უნდა ვიდგეთ ჩვენი ფესვებისა და სიძველეების სადარაჯოზე, რომელიც ქართველის სულს კვებავს“, - აცხადებს ისტორიის დოქტორი, პროფესორი ნიკო ახალკაცი და ამატებს, რომ საყდრისმა პროგრესულად მოაზროვნე ყველა ქართველი გააერთიანა და სამცხე-ჯავახეთის უნივერსიტეტის სტუდენტები ამ საზოგადოების ღირსეული წარმომადგენლები არიან.

სასწავლებლის ეზოდან სტუდენტებმა ქუჩებში მსვლელობა მოაწყვეს: „საყდრისის შესახებ ასე კიდევ უფრო მეტ ადამიანს გავაგებინებთ“.





[თამუნა უჩიძე, ახალციხე]