ახალციხის მერია 'მწვანე სახლს' ესტუმრა

მერიის წარმომადგენლებმა ‘მწვანე სახლის’ ბენეფიციარებს ტკბილეული და საჩუქრები მიუტანეს და თანადგომას დაჰპირდნენ.

„კარგი იქნება არამარტო სახელმწიფოს მხრიდან ყურადღება, არამედ სხვა სექტორების მხრიდანაც, რადგან ბავშვები ყველა სიახლეს პოზიტიურად ხვდებიან“, – ამბობს „მწვანე სახლის“ ახალციხის ფილიალის დირექტორი ელისო თათეშვილი.

„მწვანე სახლი ახალციხის ფილიალი“ 2011 წელს გაიხსნა. ცენტრის გახსნის სურვილი ელისო თათეშვილს და მის მეუღლეს გაუჩნდათ. მათ თავად ჰყავთ აუტისტი შვილი და როგორც ელისო თათეშვილი ამბობს, სწორედ მისი დამსახურებაა, რომ დღეს ახალციხეში მსგავსი ცენტრი არსებობს. მათ ცენტრის გახსნაში კათოლიკე მონაზვნები, წმინდა ნინოს დები დაეხმარნენ.

„მონაზვნებმა საფრანგეთში სხვადასხვა ფონდები და დონორი ორგანიზაციები მოიძიეს და დღესდღეობით მათი დახმარებით არსებობს ეს ცენტრი“, – ამბობს ელისო თათეშვილი.

'მწვანე სახლის' ახალციხის ფილიალს 18 ბენეფიციარი ჰყავს. სარეაბილიტაციო ცენტრი დღესაც საფრანგეთიდან მიღებული შემოწირულობებით არსებობს.

შეგახსენებთ, 2 აპრილს მსოფლიო აუტიზმის შესახებ ცნობიერების ამაღლების დღეს აღინიშნავს. წელს ამ დღის სლოგანია: „პატივისცემა, მიმღებლობა, ჩართულობა“. კამპანიის მიზანია აუტიზმის შესახებ პოზიტიური და სასარგებლო ინფორმაციის გავრცელება.

2 აპრილი აუტიზმის შესახებ ინფორმირებულობის მსოფლიო დღედ გაეროს გენერალურმა ასამბლეამ 2007 წელს გამოაცხადა. ინიციატივას ერთხმად შეუერთდა მსოფლიოს ყველა ქვეყანა, მათ შორის საქართველო.

2 აპრილს მსოფლიოს სხვადასხვა ქალაქებში ღირსშესანიშნაობები ლურჯ ფერში ნათდება, რაც „Light It Up Blue“ კამპანიის ნაწილია და საზოგადოებაში აუტიზმის შესახებ ინფორმირებულობის ამაღლებას ემსახურება.

[ნინო ნარიმანიშვილი, ახალციხე]