ურავლის ტყეში ხანძრით მიყენებული ზარალის ოდენობას ვერ ითვლიან

თოვლის მოსვლის გამო სამცხე-ჯავახეთის სატყეო სამმართველომ ურავლის ტყეში ზარალის თვლის პროცესი შეწყვიტა.

‘დავიწყეთ, მაგრამ იქ იმხელა თოვლი მოვიდა, მუშაობა ფიზიკურად შეუძლებელია, სანამ თოვლი არ ადნება, ვერ ვიმუშავებთ. შესაძლოა ზარალის დასათვლელად ჯგუფი თბილისიდანაც გამოგზავნონ’, - ამბობს სამცხე-ჯავახეთის სატყეო სამმართველოს უფროსი ფრიდონ ტაბატაძე.

მისი თქმით, ხეების ნაწილი ნაწილობრივადაა დამწვარი: ’რა არის დაზიანებული და რა არა, ამის გარკვევას ყველა ხესთან მისვლა და დათვლა სჭირდება’.

რაც შეეხება დამწვარი ფართობის რაოდენობას, მისი თქმით, ხანძარმა 22 ჰექტარს გადაუარა, თუმცა ფართობის ნაწილი მინდორი იყო.

ხანძრის გამომწვევ მიზეზებზე ტაბატაძე არ საუბრობს: ’ეს გამოძიების დასადგენია’.

შეგახსენებთ, ახალციხის მახლობლად, ურავლის ტყეში ხანძარი 2 დეკემბერს გაჩნდა. ხანძრის ლოკალიზება მეორე დღეს, გვიან მოხერხდა.

[თამუნა უჩიძე, ახალციხე]