სატყეო სააგენტოს უფროსი: ‘საკირეში ცეცხლის კერა აღარ გვაქვს’

თორნიკე გვაზავას თქმით, საკირს ტყეში, დაახლოებით, ნახევარი ჰექტარი ფართობია დამწვარი: „ხმელი ფიჩხები იწვის, იმ ადგილზე ძირითადად ბუჩქნარია. ლიკვიდირება რომ მოხდება, ზუსტად ფართობს მერე ავზომავთ“.

გვაზავა ამბობს, რომ ცეცხლის გავრცელების საშიშროება აღარაა: „გარშემო თხრილები აქვს გაკეთებული, ღია კერაც აღარ არის, ახლა ნიადაგს ამუშავებენ. რამდენ ხანში დასრულდება ეს პროცესი ქარზე და ამინდზეა დამოკიდებული“.

მისივე თქმით, ხანძრის კერამდე ტექნიკის შეყვანა ამ დრომდე ვერ შეძლეს: „ახლა ამის საჭიროება აღარც არის. ასევე არ გამხდარა საჭირო ვერტმფრენის გამოყენება. იქ ამ დრომდე ცოცხალი ძალა მუშაობს“.

საკირეს ტყეში ხანძარი ამ დროისთვის ლოკალიზებულია. ტყეში ცეცხლი, გუშინ 30 აპრილს, დაახლოებით, 19:00 საათზე, სოფლიდან შვიდი კილომეტრის მოშორებით გაჩნდა.

[sknews.ge]