ტუბერკულოზის სტატისტიკა სამცხე–ჯავახეთში

2016 წელს გამოვლენილი 9 შემთხვევიდან 3 მოქალაქე ბორჯომის მუნიციპალიტეტის მცხოვრებია, 3 ახალციხის, 2 ადიგენის, 1 კი ნინოწმინდის.
გასულ, 2015 წელს, რეგიონში დაავადების 42 შემთხვევა გამოლინდა. ამათგან, 22–ს ტუბერკულიოზის ღია ფორმა, 11–ს მოლეკულურ დონეზე გამოკვლეული ჯინ ექსპერტ–დადებითი, დანარჩენებს კი არა გადამდები ფორმა დაუდგინდა.

„ჩვენს რეგიონში ნაკლებად არის გავრცელებული ტუბერკულოზი. გასულ წელს ყველაზე რთული, მულტირეზისტენტული ფორმა სამცხე–ჯავახეთის რეგიონში არ დაფიქსირებულა“, – განმარტავს აბასთუმნის ტუბსაავადმყოფოს დირექტორი, ტუბერკულიოზის საკითხში სამცხე–ჯავახეთის კოორდინატორი ტარიელ ენდელაძე.

მისივე თქმით, აბასთუმნის საავადმყოფოში ამ ეტაპზე 61 პაციენტი მკურნალობს. გასულ წელს 48 მკურნალობდა.

წელს აბასთუმნის ტუბსაავადმყოფოს ჯანდაცვის სამინისტრომ რენდგენის ახალი აპარატი გადასცა. როგორც დაწესებულების დირექტორი ტარიელ ენდელაძე განმარტავს, აპარატის საშუალებით, პაციენტებს, რომლებიც ტუბსაავადმყოფოში არიან, მკურნალობა გაუუმჯობესდებათ.

რაც შეეხება კონკრეტულად ახალციხეს, შპს ,,უნიმედი სამცხეს“ ტუბერკულიოზის კაბინეტში ამ დროისთვის 19 ადამიანია რეგისტრირებული. მათგან გადამდები ფორმა 10–ს, ხოლო ფილტვგარეშე 3–ს აქვს. აქედან, გასულ წელს 15 იყო რეგისტრირებული, წელს 4 ახალი დაემატა, რომელთაგან 3–ს გადამდები ფორმა აქვს.

„ტუბერკულიოზით დაავადებულებისთვის არსებობს სახელმწიფო პროგრამა, მათ მედიკამენტები და მკურნალობა უფასო აქვთ. გარდა ამისა, წახალისების მიზნით 160 ლარს იღებენ ეტაპობრივად. ინტენსიური მკურნალობისას 60 ლარს, ხოლო 4 წლის შემდეგ, თუკი მკურნალობას მიყვებიან 100 ლარი ემატებათ“ , – განმარტავს ფთიზიატრი ნინო მერაბიშვილი.

ტუბერკულოზი არის ინფექციური დაავადება, რომელსაც იწვევს რამდენიმე სახეობის მიკრობაქტერია. დაავადება ყველაზე ხშირად აზიანებს ფილტვებს. მეოცე საუკუნემდე იგი პრაქტიკულად განუკურნებადი იყო. ჯანდაცვის მსოფლიო ორგანიზაციის მონაცემებით, მსოფლიოში ყოველწლიურად ტუბერკულოზით დაახლოებით 9 მილიონი ადამიანი ავადდება და 2 მილიონამდე შემთხვევა ლეტალურად მთავრდება.

შეგახსენებთ, რომ 24 მარტს აღინიშნება ტუბერკულოზის მსოფლიო დღე იმ თარიღის აღსანიშნავად, როდესაც ნობელის პრემიის ლაურეატმა, გერმანელმა მეცნიერმა რობერტ კოხმა ტუბერკულოზის გამომწვევი მიკობაქტერია აღმოაჩინა (1882).

დღევანდელი დღე ახალციხეში სხვადასხვა ღონისძიებებით აღნიშნეს.

[თაკო ფეიქრიშვილი, ახალციხე]