'გავერთიანდეთ ტუბერკულოზის დასამარცხებლად'– ხვალ ტუბერკულოზთან ბრძოლის მსოფლიო დღეა

ჯანმრთელობის მსოფლიო ორგანიზაციის ინიციატივით, 24 მარტს აღინიშნება ტუბერკულოზის მსოფლიო დღე იმ თარიღის აღსანიშნავად, როდესაც ნობელის პრემიის ლაურეატმა, გერმანელმა მეცნიერმა რობერტ კოხმა ტუბერკულოზის გამომწვევი მიკობაქტერია აღმოაჩინა (1882).

ჯანმრთელობის მსოფლიო ორგანიზაციის მონაცემებით, მსოფლიოში ყოველწლიურად 9 მილიონი ადამიანი ავადდება ტუბერკულოზით და 1,5 მილიონზე მეტი იღუპება.

2014 წელს საქართველოში რეგისტრირებული იყო ტუბერკულოზის ყველა ფორმის 3,850 შემთხვევა (პრევალენტობა - 103 შემთხვევა 100,000 მოსახლეზე); მათგან 2,807 შემთხვევა იყო ახალი (ინციდენტობა - 75 შემთხვევა 100.000 მოსახლეზე). წინასწარი მონაცემებით 2015 წელს საქართველოში რეგისტრირებული ტუბერკულოზის შემთხვევათა აბსოლუტურმა რაოდენობამ შეადგინა 3 615.

2015 წელს გამოიკვეთა ტუბერკულოზის საერთო შემთხვევების და მათ შორის მულტირეზისტენტული ფორმის შემთხვევათა კლება ქვეყნის მასშტაბით. ეს მიღწეულ იქნა სახელმწიფოს, ადგილობრივი და საერთაშორისო პარტნიორების ძალისხმევით. თუმცა, დაავადების შემცირების დადებითი ტენდენციის მიუხედავად, მულტირეზისტენტული (MDR) ტუბერკულოზი კვლავ რჩება ქყევნის მთავარ გამოწვევად საზოგადოებრივი ჯანმრთელობის სფეროში.

დაავადებათა კონტროლის ეროვნული ცენტრის ინფორმაციით, ბოლო რამოდენიმე წლის განმავლობაში ტუბერკულოზის კონტროლის მიმართულებით ქვეყანაში გახორციელებული ღონისძიებების შედეგად გაიზარდა დაავადების დიაგნოსტიკასა და მკურნალობაზე მიმართული სახელმწიფო დაფინანსება, რომელიც სხვა უმნიშვნელოვანეს საკითხებთან ერთად - პაციენტთა ფულადი წახალისების სქემის თანადაფინანსებასაც უნზრუნველყოფს: "2015 წლიდან მულტირეზისტენტული ტუბერკულოზის მკურნალობა მიმდინარეობს ახალი რეჟიმების მიხედვით (ჯანმო-ს რეკომენდაციების შესაბამისად განახლებული გაიდლაინების მოთხოვნათა დაცვით); ქვეყანაში პროგრამულად ხელმისაწვდომია ახალი მედიკამენტი - ბედაქილინი (აშშ-ს საერთაშორისო განვითარების სააგენტოს გლობალური დონაციის პროგრამით); 2015 წელს, ქვეყანამ საბიუჯეტო სახსრებით პირველად შეიძინა ტუბერკულოზის სამკურნალო პირველი რიგის მედიკამენტები".

[SKNEWS.GE]