ახალციხეში ტუბერკულოზის შემთხვევებმა იკლო

ახალციხის რეფერალური ჰოსპიტალის ტუბერკულოზის კაბინეტის ექიმი ნინო მერაბიშვილი აცხადებს, რომ ბოლო დროს ტუბერკულოზის შემთხვევებმა იკლო.

მისი თქმით, მიმდინარე წელს ახალგამოვლენილი მხოლოდ სამი შემთხვევაა: „ოღონდ მათ შორის ორი ჯერ გადამდებია. ამ ორიდან ერთი, აბასთუმნის ტუბსაავადმყოფოში, გუშინ გავუშვი“.

გასულ, 2016 წელს, ტუბკაბინეტში რიცხული 23 პაციენტი იყო: „6 თვის გასვლის შემდეგ რეგისტრაციიდან იხსნებიან. შარშადელებიც და წელს დამატებული პაციენტებიც, ამ დროისთვის სულ 7 მყავს, აქედან ორი სტაციონარშია“.

პაციენტები, რომლებსაც ტუბერკულოზის გადამდები ფორმა აქვთ, სტაციონარში უნდა იწვნენ, თუმცა როგორ ნინო მერაბიშვილი ამბობს, ოჯახური პორიბების გამო ამას ყველა ვერ ახერხებს: „ამიტომ მოდიან, იღებენ წამლებს და სახლში მკურნალობენ. თუმცა ეს, ბუნებრივია, საშიშია მათი ოჯახის წევრებისთვის“.

რაც შეეხება ბოლო დროს ტუბერკულოზის შემთხვევების კლების ტენდენციას, მერაბიშვილი ამბობს, რომ ეს შესაძლოა სახელმწიფო პროგრამის კარგად მუშაობის შედეგი იყოს: „მათ უფასოდ მიეწოდებათ მედიკამენტები, სახელმწიფო ყველაფერს აკეთებს იმისთვის, რომ ეს ადამიანები გამოჯანმრთელდნენ“.

მისი თქმით, მთავარი სირთულე დღეს მაინც ის არის, რომ პაცინეტები ექიმებს გვიან აკითხავენ: „შორს წასული ფორმით მოდიან ჩვენამდე. მერე უკვე მკურნალობის ეფექტიც იგვიანებს“.

შეგახსენებთ, რომ დღეს, 24 მარტს ტუბერკულოზის მსოფლიო დღე აღინიშნება. ტუბერკულოზის მსოფლიო დღე, 1982 წლიდან, ყოველწლიურად, ჯანმრთელობის მსოფლიო ორგანიზაციის ინიციატივით, იმ თარიღის აღსანიშნავად აღინიშნება, როდესაც ნობელის პრემიის ლაურეატმა, გერმანელმა მეცნიერმა რობერტ კოხმა ტუბერკულოზის გამომწვევი მიკობაქტერია აღმოაჩინა (1882), რამაც საფუძველი დაუდო ტუბერკულოზის დიაგნოსტიკასა და მკურნალობას.

[თამუნა უჩიძე, ახალციხე]