როგორ აღნიშნეს 24 მარტი ახალციხეში

ახალციხის ჯანდაცვის ცენტრის წარმომადგენლებმა ქალაქის ცენტრალურ პარკსა და საგანმანათლებლო დაწესებულებებში საინფორმაციო აქცია გამართეს.

„საინფორმაციო ხასიათის ბუკლეტები დავარიგეთ სამცხე–ჯავახეთის უნივერსიტეტში, კოლეჯ ოპიზარში, საჯარო სკოლებსა და ცენტრალურ პარკში“, – განმარტავს ცენტრის ხელმძღვანელი ფატი ხაბულიანი.

ტუბერკულოზი იყო დღის აქტივობების მთავარი თემა „დემოკრატ მესხთა კავშირის“ ბაზაზე არსებული ახალგაზრდული ცენტრისთვისაც. ტოლერანტობის, სამოქალაქო ცნობიერებისა და ინტეგრაციის მხარდამჭერი პროგრამის ‪(‎PITA) ფარგლებში, ცენტრის ახალგაზრდები დღის პირველ ნახევარში ექიმ–თერაპევტს კონსტანტინე დგებუაძეს შეხვდნენ.

ექიმი ახალგაზრდებს დაავადების გამომწვევ მიზეზებზე, გავრცელების გზებზე, სიმპტომებზე, დაავადების ფორმებსა და მკურნალობის მეთოდებზე ესაუბრა. შეხვედრაზე განიხილეს ტუბერკულოზის გავრცელების სტატისტიკა და დაავადებასთან ბრძოლის გზები.

ჯანდაცვის ცენტრის მსგავსად, ლექციის შემდეგ ახალგაზრდებმა ქალაქის ცენტრში გადაინაცვლეს და საინფორმაციო ბუკლეტები გაავრცელეს.
ტუბერკულოზი არის ინფექციური დაავადება, რომელსაც იწვევს რამდენიმე სახეობის მიკრობაქტერია. დაავადება ყველაზე ხშირად აზიანებს ფილტვებს. მეოცე საუკუნემდე იგი პრაქტიკულად განუკურნებადი იყო.

მსოფლიოში ყოველწლიურად ტუბერკულოზით დაახლოებით 9 მილიონი ადამიანი ავადდება და 2 მილიონამდე შემთხვევა ლეტალურად მთავრდება.

შეგახსენებთ, რომ ჯანმრთელობის მსოფლიო ორგანიზაციის ინიციატივით, 24 მარტს აღინიშნება ტუბერკულოზის მსოფლიო დღე იმ თარიღის აღსანიშნავად, როდესაც ნობელის პრემიის ლაურეატმა, გერმანელმა მეცნიერმა რობერტ კოხმა ტუბერკულოზის გამომწვევი მიკობაქტერია აღმოაჩინა (1882). 2016 წლის ტუბერკულოზის მსოფლიო დღის თემაა გლობალური მზაობა ტუბერკულოზის ეპიდემიის დასამთავრებლად - “Unite to End TB”– „გავერთიანდეთ ტუბერკულოზის დასამარცხებლად“.







[ეკა ბერიძე, ახალციხე]