სად დარგავენ საჩუქრად მიღებულ წიწვოვანი და ფოთლოვანი ჯიშის ნერგებს

როგორც სამცხე-ჯავახეთის გუბერნიაში განმარტავენ, გარემოს დაცვის სამინისტროს ინიციატივით გამოყოფილი წიწოვანი და ფოთლოვანი სახეობის ნერგები მუნიციპალიტეტებში სხვადასხვა რაოდენობით გადანაწილდა.

ნინოწმინდა: 210 არყი, 400 ფიჭვი, 50 ევროპული ნაძვი.
ახალქალაქი: 60 არყი, 70 ფიჭვი, 15 ნაძვი.
ბორჯომი: 160 არყი, 105 ფიჭვი, 50 ევროპული ნაძვი.
ადიგენი: 60 არყი, 70 ფიჭვი, 15 ევროპული ნაძვი.

როდის დაიწყება ნერგების დარგვის პროცესი, ზუსტ თარიღს სამცხე-ჯავახეთის გუბერნიაში ვერ ასახელებენ. მათი ინფორმაციით, ახალქალაქისა და ნინოწმინდისათვის გამოყოფილი ხე–მცენარეები რამდენიმე კვირით მიწაში დაიფლობა, რადგან იქ არსებული კლიმატური პირობები, ყინვა და სიცივე ამ ეტაპზე დარგვისთვის ხელსაყრელი არ არის.

ბორჯომის მუნიციპალიტეტში ხეები ახალდაბის, ყვიბისის, ტბის, ბაკურიანის, დვირის, ტაძრისისა და წაღვერის ადმინისტრაციული ერთეულების სოფლებში დაირგვება. ქალაქ ბორჯომში კი ნერგების განაშენიანება ცენტრალურ სკვერში იგეგმება.

კონკრეტული დასახლებები, სადაც ნარგავებს გადაანაწილებენ, არ გამოუყვიათ ადიგენში. ადგილობრივ თვითმმართველობაში ამბობენ, რომ ნერგები თითქმის ყველა სოფლისთვის არის გათვალისწინებული და სკოლებისა და საბავშვო ბაღების ეზოებში დაირგვება.

გარემოს დაცვის სამინისტროს ინიციატივით, სამცხე-ჯავახეთის გარდა, წიწვოვანი და ფოთლოვანი სახეობის ნერგები საქართველოს კიდევ 3 რეგიონს: მცხეთა-მთიანეთს, რაჭა-ლეჩხუმსა და სამეგრელო-ზემო სვანეთს გადაეცა.

[თაკო ფეიქრიშვილი, ახალციხე]