ახალციხეში ხეებს გადაბელავენ და ახალ ნერგებს დარგავენ

ახალციხის მერია მომავალი თვიდან ხეების ნაწილს გადაბელავს, ნაწილს კი მოჭრის.

„ჯერ უნდა შევისწავლოთ, რომელს სჭირდება გადაბელვა და რომელს მოჭრა. მოჭრილი ხეების ადგილზე კი ახალ ნერგებს დავრგავთ“, – ამბობს ახალციხის მერი ვლადიმერ ზედგინიძე.

მისი თქმით, ქალაქში 5 000–ზე მეტი ახალი ხე დაირგვება: „მთელ ქალაქს ავითვისებთ. უფრო კონკრეტულად კი ცხრა აპრილის ქუჩის მთელ გაყოლებას, აქ თან სკვერიც კეთდება, ასევე შემოსასვლელში ხიდიდან ბაზართან არსებულ ხიდამდე“.

როგორც მერიაში აცხადებენ, ამ ეტაპზე სხვადასხვა ნერგების შემოტანა განიხილება.

„ფოთლოვანი ნერგები შედარებთ ძვირია წიწვოვანზე. დაახლოებით მეტრნახევრიანი ნერგების შემოტანა გვინდა და მათი ღირებულება 15–დან 20–ლარამდე მერყეობს, თუმცა გააჩნია ნერგებს“, – ამბობს ვლადიმერ ზედგინიძე.

ქალაქის მერი იმედოვნებს, რომ ნერგების დარგივს პროცესში არა მხოლოდ თვითმმართველობის წარმომადგენლები, არამედ მთელი ქალაქი ჩაერთვება.



[თამუნა უჩიძე, ახალციხე]