ბორჯომის ‘ეტალონ’ მოსწავლეს გამგეობამ ყოველთვიური სტიპენდია დაუნიშნა

ბორჯომის მუნიციპალიტეტის საჯარო სკოლებს შორის ეროვნული მედიაპროექტის „ეტალონის” შესარჩევი კონკურსი გუშინ,17 მარტს გაიმართა. კონკურსში მუნიციპალიტეტის მასშტაბით 14 საჯარო და ერთი კერძო სკოლა მონაწილეობდა.

15 მოსწავლეს შორის 80 ქულით გამარჯვება ბორჯომის მესამე საჯარო სკოლის მოსწავლემ გიორგი თოთლაძემ მოიპოვა.

ბორჯომის მუნიციპალიტეტის გამგებლის დიმიტრი ყიფიანის ინიციატივით, გამარჯვებულ გიორგი თოთლაძეს ბორჯომის მუნიციპალიტეტის გამგეობისგან ერთი წლის განმავლობაში ყოველთვიურად 150 ლარი გადაეცემა.

ღონისძიება ბორჯომის მუნიციპალიტეტის გამგეობის ფინანსური მხარდაჭერით გაიმართა. ღონისძიების დასასრულს კონკურსის ყველა მონაწილეს სიმბოლური სიგელები გადაეცათ. გარდა ამისა, კონკურსის მონაწილეები ვაჟა-ფშაველას მოთხრობების ქართულ-ინგლისური ვერსიით დაასაჩუქრეს.

შეგახსენებთ, რომ ‘ეტალონმა’ შესარჩევი კონკურსი სამცხე–ჯავახეთის ყველა მუნიციპალიტეტში გამართა. გამარჯვებული მოსწავლეები 14 მაისს, თბილისში, სპორტის სასახლეში, საქართველოს პირველობისთვის იბრძოლებენ.

[ვარლამ წიკლაური, ბორჯომი]