ბორჯომში ახალგაზრდა პიანისტთა კონკურსი დასრულდა

კონკურსის ბოლო დღეს ჟიურის წევრები- პიანისტები თამარ ლიჩელი, ვალერიან შუკაშვილი და მივა ჰოიანო, მსმენელის წინაშე მუსიკალური ნომრებით წარსდგნენ.

კონცერტის ფარგლებში გაიმართა კონკურსანტების დაჯილდოების ცერემონიალიც. ჟიურის გადაწყვეტილებით, გამარჯვებულ კონკურსანტებს ლაურეატის წოდება და ფულადი პრემია გადაეცათ. მონაწილეთა შორის გამოვლინდნენ დიპლომანტებიც.

კონკურსის გრან-პრის მფლობელი თბილისელი ანა ბაქრაძე გახდა. პიანისტთა კონკურსში მონაწილეობას იღებდნენ ბორჯომის სამუსიკო სკოლის 4 მოსწავლე. მათგან I ასაკობრივი ჯგუფის დიპლომატი ანა დარსანია გახდა, ხოლო III პრემია ელენე სამსონაშვილს ხვდა წილად.

ბორჯომის მუნიციპალიტეტის კულტურის სამსახურის უფროსმა მარინა ხუჯაძემ კონკურსის მონაწილე ოთხივე ბორჯომელ მოსწავლეს კონკურსში წარმატებული მონაწილეობისათვის სიგელები გადასცა.

ადგილობრივი თვითმმართველობის სახელით, ნაყოფიერი მოღვაწეობისათვის ბორჯომის სამუსიკო სკოლის პედაგოგი მარინა რატიანი დაჯილდოვდა. მას მარინა ხუჯაძემ დიპლომი და საოჯახო ტექნიკის ბარათი გადასცა.

ღონისძიების დასასრულს ორგანიზატორებმა ბორჯომში კონკურსის დაარსება დადებითად შეაფასეს და იმედი გამოთქვეს, რომ ეს ტრადიციად იქცევა და მომავალში საერთაშორისო მნიშვნელობას შეიძენს.

[Sknews.ge]