საქართველოში დაგროვებითი საპენსიო სისტემა ამოქმედდება

გიორგი კვირიკაშვილის განმარტებით, სისტემა დამსაქმებელსა და დასაქმებულს შორის შეთანხმებითა და ბიუჯეტის თანადაფინანსებით განხორციელდება.

„ეს სისტემა გულისხმობს არსებული საპენსიო სისტემის ჩარჩოებში მოქცევას, იმ კუთხით, რომ პენსიონერების საბაზისო უზრუნველყოფა ყოველთვის ხდებოდეს ინფლაციის გათვალისწინებით ინდექსაციის პირობებში და ახალი დამატებითი დაგროვებითი კომპონენტის შექმნას, რომელიც მომავალი წლის მესამე კვარტლიდან ჩაირთვება. მანამდე ჩვენ გვექნება საკანონმდებლო და ინსტიტუციური ცვლილებების გაწერილი გეგმა.საუბარია დასაქმებულის, დამსაქმებლის და სახელმწიფო ბიუჯეტის მხრიდან თანადაფინანსებულ დაგროვებით სისტემაზე, რომელიც მომავალი პენსიონერებისთვის სოციალური უზრუნველყოფის იმ დონეს შექმნის, რაც გაცილებით სხვა ხარისხის სიბერეს უზრუნველყოფს“, - განაცხადა პრემიერ-მინისტრმა.

როგორც მთავრობის მეთაურმა აღნიშნა, ახალი სისტემა არსებული საბაზისო სისტემის გაუქმებას არ გულისხმობს.

მოდელის ამოქმედების შემდეგ, კერძო დაგროვებით სისტემაში მონაწილეობა ნებისმიერი ასაკის მოქალაქეს საპენსიო ასაკამდე შეეძლება . უკვე პენსიონერები კი სისტემაში ვერ ჩაერთვებიან.

ახალი მოდელის მიხედვით, მოქალაქე საპენსიო ფონდში ხელფასის 2%-ს გადარიცხავს, დამსაქმებელი და სახელმწიფო ვალდებულები იქნებიან, დამატებით კიდევ 2-2% გადაურიცხონ. ჯამში დაგროვებული თანხა არ დაიბეგრება.

დაგროვებით საპენსიო სისტემაში შეტანილი თანხა, მოქალაქის გარდაცვალების შემთხვევაში 100%-ით, მემკვიდრეს გადაეცემა. არსებობს კრიტერიუმები, რომლებიც დანაზოგის გარდაცვალებამდე გამოყენებას გულისხმობს. კერძოდ, დაინვალიდება ან მძიმე სენით დაავადება.

საპენსიო დაგროვებითი სისტემის პროექტს ეკონომიკის სამინისტრო განახორციელებს. პროექტის განხორციელება 2017 წლის ოქტომბრის თვიდან დაიწყება.

[თაკო ფეიქრიშვილი, ახალციხე]