თამარ სანიკიძე: მასწავლებელთა გამოცდების შედეგები სახარბიელო არ არის, მაგრამ უკეთესი მოლოდინი არ იყო

თამარ სანიკიძის თქმით, სახელმწიფომ სისტემა თავიდან ბოლომდე შეცვალა. შეიქმნა სისტემა, რომლის მიხედვითაც ყველა მასწავლებელს თანაბრად ექნება საშუალება, საჭიროებებზე მორგებული გადამზადება გაიაროს. ეს სისტემა 2015 წლის სექტემბრიდან ამოქმედდა და პირველად 2016 წლის ზამთარში ჩატარდა ტესტირება: "უნდა ვიცოდეთ ისიც, რომ ტესტის ჩაბარების უფლება მასწავლებელს აქვს კიდევ სამი წლის განმავლობაში და წელიწადში ორჯერ გადამზადების კვალდაკვალ ისინი შეძლებენ, ჩააბარონ ტესტი".

მისივე თქმით, გამოცდების შედეგები შეისწავლეს და საკმაოდ ბევრია იმ მასწავლებლების რაოდენობა, რომლებსაც დააკლდათ ნახევარი ან ერთი ქულა: „ისინი პოტენციურად შემდეგ გამოცდებზე ჩაბარების კანდიდატები არიან".

მინისტრის თქმით, სახელმწიფომ უკვე მოძებნა გამოსავალი, გაუკეთა ორგანიზება და კოორდინირება ყველა საერთაშორისო ორგანიზაციისა თუ დონორის მიერ განსახორციელებელ ღონისძიებებს: „ვიცით, რომ მილენიუმის კომპაქტის ერთ-ერთი კომპონენტი - 16 მლნ მიმართულია სწორედ მასწავლებელთა განათლების ხელშეწყობაზე, ასევე დაგეგმილია ყველა ის საჭირო ღონისძიება, რომელიც ამ წუთებში მიმდინარეობს და ჩვენ ვიცით, რომ სიახლის შემდეგ შედეგები მეორე დღეს არ დგება. აქედან გამომდინარე, ჩვენ ვაგრძელებთ მასწავლებელების მხარდაჭერას, რომ მათ სამი წლის განმავლობაში უპასუხონ გამოწვევებს და მოთხოვნებს, რომლებიც სახელმწიფომ დაუსახა".

მინისტრის თქმით, სწორია სტატისტიკა, რომელიც გამოცდების ეროვნული ცენტრის ვებგვერდზე არსებობს.

"მასწავლებლები სხვადასხვა მიმართულებით გადიან სხვადასხვა შედეგებს. მაგალითისთვის გეტყვით საკლასო დაკვირვების შესახებ, სადაც პედაგოგებს გაცილებით უკეთესი შედეგები აქვთ. ეს რამდენიმე ფაქტორთან არის დაკავშირებული, რამდენად შეუძლია მასწავლებელს დაადასტუროს თავისი ცოდნა იმ ფორმატით, რასაც ტესტით ვთავაზობთ, რამდენად მორგებულია და ადაპტირებულია თანამედროვე ტექნოლოგიებთან და ა.შ. ეს პრობლემა, რომელზეც ვსაუბრობთ ბევრი წლის წინ დაიწყო, მხოლოდ შარშანწინ მოხდა ამ პრობლემის მოსაგვარებლად იმ სისტემის შეთავაზება, რომლითაც უნდა დავძლიოთ ეს პრობლემა. ეს რომ ხუთი წლის წინ დაწყებულიყო, სხვა შედეგი გვექნებოდა. შედეგები გარკვეულ პერიოდში გვექნება და არც თუ ისე შორს", - აღნიშნა მინისტრმა.

შეგახსენებთ, "ბიზნესკონტაქტის" ინფორმაციით, მასწავლებელთა 83%–მა პროფესიული გამოცდის მინიმალური ზღვარი ვერ გადალახა.

[sknews.ge]